"Preparasaun entermus lojistika material ekipamentu sira ne’ebé mak utiliza ba eleisaun kuaze kompletu ona. Ohin mós UNDP fó sai katak tinta ida ne’ebé mak ita sei utiliza iha eleisaun ohin sei to’o iha Dili”, dehan Diretór Jerál STAE, Acilino Manuel Branco, iha Timor-Plaza, kuarta (22/12).
STAE haree katak material sira ne’ebé mak importante tebes ne’ebé sei utiliza ba eleisaun, mak hanesan tinta, nomós enkuadramentu legal ne’ebé mak semana kotuk STAE halo ona revizaun ba regulamentu sira ne’ebé mak ninia impaktu mai husi revizaun ba lei eleitorál nian.
Dadauk regulamentu hamutuk 11 ne’ebé mak hetan ona apresiasaun husi CNE no haruka ona ba Ministériu Administrasaun Estatal (MAE) hodi bele aprezenta ba Konsellu Ministru.
"Ida ne’e mós sai hanesan ajenda importante ida, ita sei tama sikulu eleitorál ninia ne’ebé sei hahú ho prosesu aprezentasaun husi kandidatura prezidente repúblika ninian”, dehan nia.
Pozisaun STAE hahú sosializa konteudu regulamentu sira ne’e hotu ninia interesante ba komunidade ein-jerál bele inteira kona-ba prosesu kandidatura no estruturamente kona-ba votasaun ne’ebé mak sei implementa iha eleisaun Prezidensial 2022.
Purtantu ko’alia kona-ba dezafiu ne'e, STAE laiha tanba instituisaun ida ne’e eziste kleur ona ho esperiénsia no rekursu ne’ebé bele dehan preparadu tanba iha ona esperiénsia organiza eleisaun ne’ebé mak ninia rezultadu hanoin públiku akompaña. (*)