"Bein, kandidatu barak mak komesa preokupa buka bensaun husi Maun Xanana kona-ba sira ne'ebé hadau malu, les malu, atu hetan bensaun ba kadeira ne'e, sé maun Xanana la'e, maibé maun xanana preokupa mak povu nia moris”, hatete Vise-Xefe Bankada CNRT, Patrocino Fernandes, iha PN, tersa (30/11).

Tanba, faktu hatudu katak maun Xanana úniku figura ne'ebé ema hothotu presiza, la'ós de'it sira ne'ebé hakarak ba tur kadeira Prezidente Repúblika nian mak presiza maibé povu tomak mós presiza hela maun Xanana atu halo servisu hodi serví, tanba ne'e Maun Xanana dalaruma preokupa liu mak povu ninia moris, no situasaun.

Bankada CNRT mós nota, prosesu atu ba tur iha kadeira Prezidente Repúblika mos la'ós maun Xanana mak fó votu, maibé povu mak sei fó votu.

"Ne'ebé depende povu haree katak nia serve sai prezidente, kala povu fó votu”, afirma nia.

Prezidente Repúblika ninia funsaun mak asegura Estadu la'ós ba estagna situasaun dezenvolvimentu país nian, no halo povu labele bok-an ba mai, viola konstituisaun konforme nia hakarak, nomós sama lei no regra hotu.

Tanba ne'e, CNRT hanoin katak povu mós haree no asiste hela, ne’ebé sé mak kandidatu ne'e depende povu mak hili, tanba durante ne'e povu mós avalia hela.

Deputadu Bankada PD, António da Conseição "Kalohan", konsidera asaun kona-bá tula liman ka bensaun ne'ebé líder sira fó ba kandidatu sira ne'e sei la eduka povu iha futuru.

Tanba ukun ne'e, tenke konkista hanesan mós ukun rasik-an ne’ebé mak konkista, ema la fò hanesan prezente ba Timoroan.

"Tanbasá avo sira, avo tiha ona mós sei husu bensaun ba malu, ka avo sira hakarak pasa de'it mensajen ida ba ita dehan katak (nasaun ne'e mak ami de'it, ami laiha imi mós laiha ona), mensajen mak ida ne'e. Ha’u hanesan jerasaun ne’ebé mós kontribui ba rai ida ne'e ninia ukun rasik-an, ha'u lamenta, ho hahalok sira hanesan ne'e, la eduka povu, atu hanoin rasik”, dehan nia.

Partidu Demokrátiku haree katak, asaun tula liman ne'e só bispu sira mak tula liman ba ema atu sai amu lulik, purtantu, kona-ba ida tula liman atu hetan oportunidade, ida ne'e la'ós bensaun loloos, maibé keta husik hela hanesan malisan ida karik sira lahatene.

"Ne’ebé ha’u hanesan mós ema Partidu Demokratiku lakohi atu hamate demokrasia lian povu nian no povu ninia eskolla, no ha’u mós sei la adere ba buat ida tula liman ne'e”, afirma nia. (*)