"Ohin simu bua malus Boaventura nian, ne'e simbóliku no simu bua malus ne'e siknifika katak, ita simu matak malirin husi ita-nia beialak sira hotu, tanba ne'e mak ohin ami hotu mai iha ne'e, simu matak malirin husi ita-nia beialak sira, liliu Dom Boaventura nian, ne'ebé mak sira hamulak hodi husik hela liafuan ida antes sira husik malus ne'e mai iha ami-nia liman", dehan PR Lú Olo hafoin halo vizita ba jardin eroi Ossuáriu Luak, tersa (16/11).
Tanba Dom Boaventura nia istoria ema hotu hatene, la'ós primera vez vijita, maibé uluk kedas seidauk halo monumentu, halo ona vijita ba uma Boaventura ninian hodi presta omenajen ba ninia pasadu ne'ebé hola parte iha istoria Timor-Leste.
"Ita presta omenajen ba Dom Boaventura hodi lenbra nafatin ba jerasaun foun sira, hodi hatene katak Timor-Leste, la'ós uluk ne'e hakruk de'it ba ema hanesan husi rai sira seluk mai, maibé sira mós dalabarak hambrik hodi hasoru maske kbi’it no forsa la to'o, entaun prontu sira tenke hetan nia konsekuénsia ne'e to'o mate", hatete nia.
Hanesan mós iha tinan 1975, bainhira nia oan no maun alin sira ho nia bei-oan sira hodi hatutan filafali hasoru kolonializmu luta ba ukun rasik-an.
Maibé ho forma sistemátiku, organizadu no orentada ba objetivu ukun rasik-an no iha altura ne'ebá hanesan ema hotu balun hatene no balun la hatene.
"Iha altura ne'ebá Indonézia invade Timor-Leste no halo invasaun rezistensiá ida durante tinan 24 nia laran, hasoru okupasaun militar Indonézia to'o ita hetan fali ita-nia indepedénsia ida ohin loron”, dehan Xefe Estadu.
Prosesu hirak ne'e hotu hatudu katak povu Timor-Leste, liliu povu Manufahi mós kontrobui barak iha prosesu luta libertasaun. (*)
