"Prezidente Repúblika sei hala’o diálogu iha munisípiu rua ne’e ho autoridade lokál, organizasaun sosiedade sivíl, veteranu, konfisoins relijioza, foinsa’e no estudante hodi esplika kona-ba situasaun polítika rai-laran no rona preokupasaun husi reprezentate sira kona-ba prosesu dezenvolvimentu iha nível nasionál no lokál”, dehan Xefe Kaza Sivíl Prezidente Repúblika, Francisco Maria de Vasconcelos, liuhusi komunikadu Imprensa, segunda (15/11).
Husi diálogu, hafoin rona hanoin sira husi komunidade, Prezidente Repúblika sei koopera ho orgaun Estadu sira seluk, liliu Governu atu halo esforsu oioin hodi hatan ba asuntu ne’ebé reprezentante husi munisípiu foti iha diálogu.
Iha diálogu, Prezidente Repúblikasei sei akompaña husi membru Governu, hanesan Ministru Agrikultura no Peskas no Ministra Saúde.
Vizita traballu Prezidente Repúblika ba munisípiu rua tuir planu hala’o iha 16-20 agostu 2021, maibé tanba kondisaun saúde, Xefe Estadu labele partisipa no adia fali diálogu ba 16-20 novembru 2021.
Ho auzénsia Prezidente Repúblika iha fulan-agostu 2021 iha munisípiu rua ne’e, Xefe Casa Civil, Francisco Maria de Vasconcelos, lori Xefe Estadu nia naran vizita Cooperativa Café Timor, Grupu Haburas Maubisse, Eskola Téknika Vokasional Akadiruhun, kuda ai-oan iha Ainaro no haree ho besik Ensinu Báziku Filial Caiseru, Grupu Agrikultór iha Casa, presta omenajen ba eroi no martires libertasaun Pátria, kuda ai-oan, Grupu Movimentu Agrikultura Progresu no Eskola Café iha Manufahi.
Ante ne’e, Prezidente Repúblika mós halo ona vizita traballu ba munisípiu Vikeké, Kovalima, Lautein, Baukau no Ermera. (*)