Tempotimor (Díli) – Deputadu sira iha Parlamentu Nasionál, Tersa (04/09/19) hetan brifing husi ekipa Ministériu Negósiu Estranjeiru no Kooperasun (MNEK) ba ASEAN, hodi nune'e Parlamentu Nasionál ho Governu bele fó informasaun hanesan, ba ekipa avaliasaun husi ASEAN.

 

"Diresaun ASEAN husi Ministériu Negósiu Estranjeiru no Kooperasun (MNEK) mai partilla ho deputadu sira kona-ba progresu sira ne'ebé durante ne'e ita alkansa ona, esforsu sira ne'ebé  ita halo ona no saida mak ita presiza halo tan. Para misaun esploratoriu ne'ebé mai ne'e bele hatene ita nia progresu no dezafiu sira, hodi nune'e Parlamentu Nasionál ho Governu bele fornese informasaun ne'ebé hanesan," informa Primeira Vise Prezidente Parlamentu Nasionál, Maria Angelina Sarmento iha PN, Tersa (03/09/19).

 

Maria subliña, molok PN hasoru ho ekipa avaliasaun ASEAN, ekipa husi diresaun ASEAN, MNEK nian tenke mai antes para fó briefing ba deputadu sira.

 

“Keta halo Governu ko'alia seluk, PN ko'alia seluk. Entaun, ekipa husi MNEK mai brifing ami para informasaun ne'ebé PN no Governu fornese bele hanesan," Maria hatete.

 

Tuir I Vise PPN ne'e, durante prosesu brifing nia laran, ko'alia barak liu kona-ba pilar tolu ne'ebé ekipa ASEAN atu halo avaliasaun. Hanesan; polítika, ekonomia no sosiál.

 

Maria dehan, Parlamentu Nasionál mós preokupa kona-ba problema ekonomia rai laran. Tanba, kuaze iha área investimentu nian maioria husi Xina to'o negósiu kiik-oan ne'ebé  Timoroan bele halo hotu, Xina investe hanesan iha merkadu.

 

“MNEK mós rekoñese ida ne'e. Maibé, MNEK sei haka'as an hodi hadiak investimentu sira ne'e tuir ita nia lei sira ne'ebé sei pendente hela, hodi nune'e halo regulasaun ba investimentu ne'ebé  povu bele halo ne'e," Maria esplika.