“Relasiona ho estrada, ponte, eletrisidade no buat balun ne'ebé mak aat hotu iha Timor laran tomak, ne'ebé mak deputadu sira kestiona, ha'u hanoin la kleur tan OJE tama iha PN, ha'u husu ba deputada sira atu detekta kedas problema sira ne'e iha suku, kada aldeia hira mak seidauk hetan, bele informa kedas ba Ministru sira ne'ebé mak sei mai ko'alia ho ita-boot sira, husu sira para tau iha orsamentu atu rezolve kedas problema sira ne'e”, dehan Ministru Francisco Martins, iha Plenária PN, segunda (04/10).
Tanba servisu bazeia ba programa ne'ebé mak iha, se asuntu hirak ne'e la tama iha programa mak problema ida no presiza haree didi’ak.
“Ha'u hanoin deputadu sira mós akompaña saida mak debate iha Parlamentu Nasionál, liuliu ho programa sira ne'e ho ninia orsamentu ne'ebé mak iha, hothotu hatene hela, la'ós katak lahatene, tanba ita hothotu servisu tuir ita ida-idak nia kna’ar, ne'ebé asuntu balun ne'ebé emerjénsia ne'e la'o hela”, dehan nia.
Ho problema hirak ne’e, labele halo hotu dala ida, tanba sei ko’alia koan-ba kapasidade ezekusaun, no ema sira ne'ebé kaer servisu mós la'ós hothotu, balun kontratu kompaña internasionál sira, ne’ebé servisu kontinua la’o, maibé ho pandemia Covid-19 halo atraza.
“Tanba ne'e mak atu informa ba deputada sira katak servisu la'o nafatin, la'ós dehan paradu maibé, la'o nafatin tuir faze por faze”, informa nia. (*)