Tempotimor (Díli) – Prezidente Repúblika Francisco Guterres Lú Olo simu konvite husi enkaregadu Santa Sé nian hodi partisipa komemorasaun tinan 30 Papa João Paulo II vizita Timor-Leste.
"Ohin enkontru ho Prezidente Repúblika kapas tebes. Tanba, Sua Exselénsia Prezidente Repúblika simu ha'u. Ha'u mai entrega konvite ba exelénsia Prezidente Repúblika ba serimonia komemorasaun vizita istórika husi Papa João Paulo II nian mai Timor-Leste ba dala tolunulu (tinan 30) iha 11 Setembru 2019. Ne'ebé sei halo misa agradesimentu ida iha Igreja Katedral Díli," hatete Enkaregadu Negósiu husi Santa Sé, Monsinhor Marco Sprizzi iha Palásiu Prezidensiál, Kuarta (21/08/19).
"PR iha disponibilidade hodi partisipa iha komemorasaun tinan 30 Papa João Paulo II mai Timor-Leste, inklui atu Sua exelénsia Prezidente Repúblika hetan saudasaun no atensaun bensaun nian, husi Santu Papa Francisco ba Timor-Leste," nia tenik.
Papa Francisco mós, tuir Monsinhor Marco Sprizzi akompaña situasaun polítika povu Timor-Leste. Papa mós kontinua reza ba Timor-Leste, para tensaun polítika ne'ebé la'o hela iha Timor-Leste bele rezolve.
Iha vizita ne'e, Exelénsia Prezidente Repúblika, Francisco Guterres Lú Olo agradese ba atensaun Santu Papa Francisco nian ba Timor-Leste. PR katak konfirma atu partisipa iha komemorasaun tinan 30 vizitasaun Papa João Paulo II mai Timor-Leste.
PR Lu Olo mós husu atu Papa Francisco reza nafatin ba Timor-Leste. Atu nune'e, Timor-Leste bele hetan solusaun ba tensaun polítika no povu nia moris ba dezenvolvimentu ho armonia.