Deputadu CNRT, José Vergilho hatete, kestaun eletrisidade sai nu’udar nesesidade inportante ida povu ba Ataúro tanba la kleur tan Ataúro sei sai ona Munisípiu.

"Agora ita haree ba Ataúro ne'e kan postu ida husi Munisípiu Dili nian, la kleur sai tán hanesan Munisípiu. Maibé to'o agora eletrisidade seidauk lakan", dehan nia iha PN, sesta (24/09).

Kestaun eletrisidade ne'e bele dehan Governu halo deskriminasaun ba povu tanba Orsamentu Jerál Estadu Parlamentu Nasionál aprova kuaze tinan rua ona, atu tau prioridade fundu infraestrutura ba liña eletrisidade maibé povu kontinua halerik.

Bankada CNRT hanesan opozisaun sente katak ko’alia ba povu nia nesesidade bázika ne'e iha buat tolu ida mak eletrisdade, estrada no bee-moos.

"Agora ba povu Ataúro ita bele dehan katak tinan rua ita aprova orsamentu dala-rua, no tinan 2021 nian ita mai tan ho raktifikativu, ne'ebé Ataúro ita bele dehan katak povu ne'ebé presiza tebes", hatete nia.

Tanba ne'e, CNRT sempre kestiona orsamentu tinan 2021 ho valor tokon US$14 ne'ebé Governu prevé atu finaliza Ró Haksolok, se osan ida ne'e mak prevé ba fundu infraestrutura eletrisidade karik, pelu menus oras ne'e bele rezolve ona eletrisidade iha Ataúro.

Durante ne'e, Postu administrativu sira iha Sidade Dili nian, eletrsidade lakan hotu ona no balun mak sei iha problema, maibé postu administrativu Ataúro to'o agora seidauk lakan normál.

Iha tinan 10 liu-bá, partidu CNRT kaer maibé programa hothotu CNRT nian, liuhusi Planu Estratèjia Dezenvolvimentu Nasionál (PEDN) hodi tau prioridade ba nesesidade bázika povu ida ne'e.

Maibé iha mandatu Governu daualu ida ne'e, sira lahatene implementa planu estratéjia dezenvolvimentu nasionál.

"Ko'alia planu Estratèjia Dezenvolvimentu Nasionál ne'e mós Governu lahatene implementa. Agora Governu ida ne'e la halo buat ida, hanesan ba tesi fita de'it, los ka la'e", hatete nia.

Xefe Bankada KHUNTO, Olinda Guterres hatete, problema eletrisdade ne'e la'ós akontese de'it iha Postu Administrativu Ataúro maibé mós akontese iha Postu Administrativu Uatuckarbau no Uatulari.

Tanba ne'e husu Governu atu buka solusaun oinsá mak populasaun sira bele asesu ba eletrisidade.

"Iha Aldeia Loko-Loko hau rasik ba to'o iha ne'eba, ampola no fiu eleteiadade teb-tebes mós sira la hatene, tanba ne'e husu Governu oinsá mak bele rezolve", dehan nia. (*)