"Relasiona ho Vasina dalarua tiha ona, Governu husu atu labele preokupa lai ho Vasina tiha ona ka seidauk ita hela hotu iha uma tiha lai", dehan Fidelis Magalhães iha Palásiu Governu, kuarta (25/08).

Ho medida drástika ne'e mak sidadaun hothotu durante loron hitu nia laran sei kofina iha uma so autoriza sira ne'ebé mak bele sai ba buka hahán ka hetan apoiu polísia no sira ne'ebé mak autoridade iha administrasaun públika maibé bainhira hetan despaixu husi Ministru sira.

"Depois de ida ne'e liu tiha iha loron 2 setembru mak Governu avalia tanba preokupasaun ho númeru aumenta moras iha 500 pur dia no prstikamente sala izolamentu ho númeru ne'ebé mak aumenta barak tebetebes ita tenke hola medida drastis ida ne'e" esplika nia.

Konfinamentu agora ne'e tanba situasaun foun variante Delta ne'e presiza komprende di'ak liután, no mós halo esforsu liliu atu asegura katak médiku sira sei bele nafatin iha kapasidade hodi servisu no ospitál la para hotu tenke hola medida drástika.

Estabelesimentu komersiál, industriál, artezanál ka prestasaun servisu nian taka ba públiku, ho ezesaun ba estabelesimentu sira ne’ebé autoriza iha rezolusaun Governu ne’e, liuliu estabelesimentu ne’ebé fa’an ai-hán no sasán nesesidade bázika nian, eletrisidade, telekomunikasaun, prestasaun kuidadu médiku, farmásia, postu kombustivel nian, no instituisaun finanseira sira.

Restaurante sira bele fornese hahán iha rejime take way ka entrega iha uma de’it no estabelesimentu sira-seluk ne’ebé taka ba públiku bele dezenvolve ninia atividade liuhusi servisu entrega ba uma de’it. (*)