Xefe bankada CNRT, Duarte Nunes hatete, pozisaun CNRT konkorda tanba CNRT iha nia prinsípiu rasik, maske la partisipa halo konstitusaun maibé, tenke fiar no respeita konstituisaun.

"Buat ne'ebé mak ami bele halo, halo para kumpre konstituisaun, ne'e ami-nia prinsípiu. Ne'ebè artigu ne'e la di'ak ita hasai artigu, ne'e laiha impaktu. Ami konkorda", deklara nia iha PN, kuarta (25/08).

Tanba proposta-lei ne'ebé Governu aprezenta, klaru katak presiza hadi'a kestaun balun, molok hakat ba eleisaun prezidensiál no parlamentar ne'ebé sei mosu.

"Ne'e presiza hadi'a buat ruma ne'ebé ita presiza hadi'a, ne'e ami-nia prinsípiu, agora se mak lori proposta mai ne'e Governu. Kuandu tribunál dehan inkonstitusionál ne'e o atu dehan saida tán, ita tenke simu", afirma nia.

Iha loron 11 fulan-agostu, Prezidente Repúblika veta diploma alterasaun dahuluk ba lei resenseamentu eleitorál, hodi haruka fila ba Parlamentu Nasionál, tanba bazeia ba akordaun Tribunál Rekursu nian ne'ebé sita artigu 17 númeru 2 inkonstitusionál.

Tanba ne'e, iha loron (24/08) Parlamentu Nasionál realiza plenária, aprova desizaun hamoos númeru 2 artigu 17 hosi Lei Resenseamentu Eleitorál, ho rezultadu votasaun a-favór 43, kontra 0 no abstensaun 0.

“Ho votu expurgação ne’e ita halo ona konfirmasaun ba artigu ne’ebé inkonstitusionál no prosesu hotu iha ne’e ona, ita la ba tán espesialidade no finál globál, depois haruka ba Komisaun A hodi halo redasaun finál", deklara Prezidente Parlamentu Nasionál (PN), Aniceto Longuinhos Guterres iha plenária PN, tersa (24/08). (*)