“Hanesan sosiedade Sivíl, ita nafatin enkoraja governu atu fó prioridades ba hothotu para nune'e sira tenke hahú ona oinsá kanaliza fali irrigasaun sira ne'e, atu nune'e komunidade ka toos na'in sira kontinua halo produsaun”, dehan Responsável Asuntu Agrikultura iha La'o Hamutuk, Mariano Ferreira, ba www.tempotimor.com iha kna’ar fatin Bebora, segunda (26/07).

Tanba akontesimentu dezastre naturál iha loron 04 fulan-Abril liuba, rezulta irrigasaun iha territóriu inklui natat ho toos barak mak hetan estragu.

Bainhira governu tarde atu responde situasaun ne'e, kuandu tama iha fulan-dezembru tinan 2021, komunidade barak sei hasoru problema boot hamlaha, tanba laiha produsaun.

 “Foin lalais akontese iha dia 04 de Abril foin lalais ne'e, seidauk hetan ajudu ruma ka, responde buat ruma ne'ebé mak ba sira. Entaun, buat sira ne'e hotu bele afeta filafali ba estadu. Tanba ne'e, governu tenke sériu duni atu haree servisu ida ne'e, no saida mak ita ezíje mak irrigasaun, buat ida produsaun ne'e, urjente tebes governu tenke halo iha tinan ne'e nia laran nomós tinan oin”, hatete nia.

Tuir informasaun balu ne'ebé akompaña husi Ministériu Agrikultura no Peskas (MAP), Pedro Reis, rasik dehan, to’o oras ne'e téknika sira seidauk bele ba Munisípiu atu oinsá normaliza irrigasaun, toos no natar ne'ebé mak hetan estragu husi inundasaun foin lalais ne'e.

“Entaun, tuir ami-nia observasaun, governu hanesan maten liu atu halo sira-nia servisu ba Munisípiu sira, e dala-barak ita haree sira foku liu iha Dili, loos, ita hatene iha Dili afeta maka’as duni, mais iha Munisípiu mós presiza ita-nia asisténsia. Pure-zemplu, iha ema nia natar, ema nia plantasaun barak bee hodi, dala-ruma ida ne'e la tama iha sira-nia lista atu oinsá bele rekupera”, afirma nia.

Tanba realidade, MAP rejísta komunidade hirak ne'ebé nia uma hetan estragu hodi tau de'it iha lista, maibé komunidade balu nia toos, natar ho plantasaun tomak, bee estraga.

“Buat sira ne'e governu tenke tetu halo didi'ak, fó prioridade ne'ebé hanesan. Labele de'it ida ne'ebé mak uma estraga, no depois husik hela ida ne'ebé mak toos ho natar estraga, tanba toos ho natar ne'e ba ema nia moris. Sé ita la kuidadu ida ne'e, la rekupera, la hadi'a filafali iha tempu badak sei afeta vítima barak liután, karik hamlaha, ho buat seluk tan, ida ne'e sai problema ida komplikadu liután”, deklara nia. (*)