"Ha'u hanoin, inisiativa ida Sekretária Estadu Kooperativa fó treinamentu ba joventude sira, liliu iha área ortikultura nia ne'e, tuir loloos importante, no atividade hanesan ne'e mak tuir loloos Ministériu Agrikultura mós tenke hola parte no tau servisu ne'ebé mak boot liu, tanba ita hatene ita-nia joven barak, ema ne'ebé mak ho idade servisu, barak liu mai hotu iha sidade Dili tanba ita-nia ekonómia ne'e sempre sentralizadu", dehan Responsável Asuntu Agrikultura iha La'o Hamutuk, Mariano Ferreira, ba www.tempotimor.com iha kna’ar fatin Bebora, segunda (26/07).

Haree ba sistema ekonómia iha rai laran sentralizadu katak, ema hanoin iha kapitál Dili mak iha osan, no buat hothotu, halo ema barak mai buka moris iha sidade.

"Ne'e la'ós tanba sira-nia sala, maibé ita-nia sistema ida sentralizadu ne'e mak hodi ema mai hotu iha ne'e. Entaun, ho inisiativa sira ne'ebé hanesan Sekreratia Estadu Kooperativa, nomós dala-ruma iha organizasaun balu, hahú organiza joven sira, atu ho kreatividade oioin atu oinsá bele halo agrikultura. Ida ne'e, inisiativa ida que tenke hetan apoiu husi, governu, doador sira nomós ema hotu", hatete nia.

Hanesan ezemplu, oras ne'e grupu joven ida iha Suku Hera, maioria universitáriu ho matenek oioin iha área agrikultura no téknika ninian, ho buat sira ne'e, sira balu remata ona, balu sei eskola, mais sira organiza malu hodi halo atividade agrikultura, tanba agrikultura ne'e nu'udár moris.

Bainhira kuda iha rai, bele produz rasik, sei independente no la depende ba ema seluk. Tanba ne’e ideia di'ak no vizaun di'ak, presiza apoiu.

Ho ida ne’e, Sekreatária Estadu Kooperativa ho Ministériu seluk ninia apoiu oinsá bele fó treinamentu, kapasita nomós fõ apoiu subsídiu atu oinsá joven sira bele haree agrikultura hanesan poténsia servisu ida.

"Ita tauk mak buat sira ne'e oras ida sai politizadu, ita halo, formasaun sira ne'e tanba politika, tanba atu hodi sira tuir sira-nia partidu ida ne'e, partidu ida ne'eba, ida ne'e mak ita la konkorda, tanba dala-barak joven ne'e sai fali sentru ba ema uza ho oioin, la tau joven hanesan joven ne'ebé mak enérjiku, iha forsa, iha ideia oioin, kreativu para bele halo buat ruma”, afirma nia.

Mais dala-ruma ho politika ne'ebé mak seidauk estavel, ho maturidade politika ne'ebé mak seidauk estável, uza fali joven sira hanesan instrumentu atu bele atinje objetivu.

Antes ne’e, Sekretáriu Estadu Kooperativa (SEKoop), Elizário Ferreira, deklara ona, joven hirak ne'ebé simu ona formasaun kooperativa, bainhira fila ba baze, sei organiza komunidade sira atu servisu ho kooperasaun, no parte SEKoop rasik nafatin halo akompañamentu ba joven sira ne'e bele hari'i kooperativa. (*)