"Tanba dalabarak ona ami la dun asesu ba informasaun iha rai laran, tanba ne'e ami agradese ba Oitavu Governu tanba bele ajuda ona ami hodi Akompaña mós situasaun iha rai laran”, dehan Vitor iha suku Suku Maumeta, segunda (19/07).
Tanba programa Governu ba instalasaun sistema dijitalizasaun Transmisain Multimedia Terstre (DTMT) liuhusi Rádiu Televizaun Timor-Leste, empreza públika (RTT-ep) bele ajuda komunidade sira ho akompaña informasaun sira.
Ministru Asuntus Parlamentares no Komunikasaun Sosiál Francisco Martins Jeronimo, ofisiálmenteiLansa instalasaun antena dijital ho STB atu komunidade akompaña informasaun iha rai laran no rai liur.
“Iha lansamentu ne'e ho objetivu katak ita-boot sira bele ona asesu informasaun iha RTTL,ep kona-ba informasaun sira iha rai laran no rai li'ur, Ázia nia laran ne'e, tanba ne'e uza ba no akompaña nafatin notísia ne'ebé fó sai”, dehan Ministru Francisco Jerónimo iha Suku Maumeta, segunda (19/07).
Tanba ne’e, husu ba komunidade sira atu akompaña nafatin notísia iha kanal RTTL EP, atu labele pániku ba situasaun iha rai laran liliu kona-ba pandemia Covid-19.
“Tanba instalasaun ida ne'e atu diversifika no fasilita Komúnidade iha nível kraik liu, hodi bele asesu ba informasaun ho di'ak no los liliu ba situasaun pandemia Covid-19”, dehan nia.
Iha fatin hanesan reprezentante komunidade suku maumeta, Bento Gonsalves, sente orgullu ho Governu tanba bele ajuda ona sira oinsá bele asesu informasaun iha nível nasionál ho di'ak.
“Durante ne'e ami rona informasaun husi ita-nia labarik sira katak informasaun ne'ebé fó sai iha facebook (FB) ne'e hanesan ne’e, ne'ebá, entaun dalaruma ami konsinte katak governu ida ne'e di'ak ida ne'e la di'ak, maibé ami kontente tebes ho Oitavo Governu nia programa ida ne'e, tanba bele ajuda ona ami hodi bele asesu diretamente informasaun iha rai laran ne'e, nune'e ami agradese tebes no orgullu boot mai ami”, dehan nia.
Iha serimónia lansamentu instalasaun antena dijitál ho STB ba komunidade sira, akompaña máximu husi komunidade sira, xefe aldeia, xefe suku, autoridade munisipal, no entidade relevante sira hotu. (*)