Totál orsamentu ne'ebé konsege tranfere ba konta bankária univesitáriu sira hamutuk tokon US$5,6.
Informasaun ne’ebé fó sai iha pájina Gabine Ministru Finansa (MF), Rui Gomes katak, pagamentu izensaun propinas estudante Institutu Ensinu Superiór (IES) ne’e halo hafoin Ministériu Ensinu Superiór, Siénsia no Kultura (MESSK) konkorda hodi halo alterasaun ba Memorandu Entendimentu (MoU) ho IES sira kona-ba propinas ba estudante sira.
Instituisun Universidade públiku no privadu sira ne’ebé hetan pagamentu mak hanesan Dili Institute of Technology (DIT), East Timor Coffee Institute (ETCI), Institute of Business (IOB), Instituto Boaventura Timor-Leste (IBTL), Instituto Católico Formação de Professores (ICFP), Instituto Ciências da Saúde (ICS), Instituto de Ciências Religiosas (ICR), Instituto Filosófico S. Francisco de Sales (IFFS), Instituto Politécnico de Betano (IPB), Instituto Profissional de Canossa (IPDC), Instituto S. João de Brito (ISJB), Instituto Superior Cristal (ISC).
Nune'e mós Instituto Superiór de Filosofia e Teologia (ISFIT), João Saldanha Institute (JSI), Universidade de Díli (UNDIL), Universidade de Paz (UNPAZ), Universidade Nacional de Timor Lorosa’e (UNTL), no ikus liu mak Universidade Oriental Timor Lorosa’e (UNITAL).
Enkuantu subsídiu internet ba estudante ensinu superiór sira, MESSK sei kompleta rekezitu ba Operadór Telekomunikasaun sira hanesan Timor Telecom, Telemor no Telkomcel hodi submete filafali mai MF iha tempu badak verifika molok realiza pagamentu.
Iha fulan-maiu 2021, Prezidente Repúblika promulga Lei Orsamentu Jerál Estadu (OJE) rektifikativu. Ho promulgasaun Lei OJE rektifikativu ne’e, lori mudansa iha dotasaun orsamentál lubun ida inklui dotasaun Fundu Covid-19, ne’ebé ho montante inisiu tokon US$31, hetan ona reforsu tokon US$256,6 nune’e ninia totál hamutuk tokon US$287,6.
Mudansa husi dotasaun Fundu Covid-19 ne’e, fó biban ba Governu hodi finansia medida sosio-ekonómiku sira inklui izensaun pagamentu propinas ba estudante ensinu superiór no subsídiu internet ba estudante ensinu superiór.
Relasiona ho ezekusaun fundu espesial covid-19, to’o iha loron 16 fulan-jullu 2021, konsege atinje ona ezekusaun reál hamutuk tokon US$94,1 ka 33% husi totál orsamentu alokadu millaun US$287,6. (*)
