“Ha'u mai iha ne'e ho governu nia naran husu ba hothotu iha postu Railako, liliu lideransa komunitária sira, xefe aldeia, joven,Veteranu sira no entidade hotuhotu, atu ita apoia malu atu halo Instalasaun ida ne'e la'o ho di'ak”, dehan Ministru Francisco Jerónimo iha postu Railako, kintao (15/07).
Tanba ne’e husus atu koopera malu ba Instalasaun sistema DTMT ne'e atu labele mosu dezentendimentu bainhira ekipa hala’o servisu.
“Ami lakohi katak bainhira to’o mai, ita hamosu fali dezentendimentu atu monta montajen sira ne'e, tanba dalabarak ita hakarak, maibé to’o tiha mai, ita komesa foti fali ona kestaun oioin husi parte hothotu”, afirma nia.
Tanba ne’e, husu ba komunidade sira hotu iha postu Railako atubele hatene programa instalasaun ba sistema DTMT no intende didi’ak.
“Ami mai ko'alia ho ita-boot sira, husu ita-boot sira atu intende katak ida ne'e di'ak ba ita-nia komúnidade sira, la'ós ba ita sira ne'ebé hanesan lideransa, ne'e di'ak ba ita hotu no ba komúnidade sira tanba komunidade presiza informasaun no asesu ba informasaun kualquer de'it la presiza hasai kustu tanba ne'e ami mai ko’alia ho ita-boot sira antes mai halo instalasaun”, esplika nia.
Nune'e husu ba xefe suku, xefe aldeia sira, atu labele mosu dezentendimentu iha instalasaun ida ne'e, bainhira dezentendimentu sei hasai fali no muda fali ba fatin sira seluk ne'ebé komunidade sira presiza.
Iha fatin hanesan Administradór Postu Railako, Arlindo dos Santos agradese ba MAPKomS tanba bele rezolve ona povu nia problema liliu iha parte komunikasaun.
“Ami orgullu, ami agradese ba Oitavu Governu liuhusi MAPKomS, nune'e ami fiar katak sei laiha dezentendimentu ba programa ida ne'e, tanba programa ida ne'e di'ak tebetebes ba komunidade, atu oinsá bele asesu informasaun iha nível nasionál no internasionál ho di'ak “, dehan nia. (*)
