“Relasiona ho señora Armanda Berta, ita-nia kestaun mak ita husu Primeiru Ministru (PM) lolos tenke suspende tanba nia halo ona deklarasaun ba públiku, nia ho razaun saida, razaun ne'e bazeia ba lei númeru 7/2016, 28 de dezembru, ne'ebe lei eleitorál ba prezidente repúblika”, dehan nia iha kna’ar fatin Kaikoli, sesta (16/07).
Maske konstituisaun la bandu sidadaun ida bainhira iha kartaun eleitorál bele ba kandidata-an maibé tenke haree mós ba artigu husi Lei númeru 7/2006, 28 dezembru kona-ba eleitorál Prezidensial.
Tanba kargu Vise Primeira Ministra no Ministra Solidaridade Sosial no Inkluzaun (MSSI) labele hasai deklarasaun ida atu nia kandidata, ne'e viola artigu 7 aliñea f.
“Se nia asume hela hanesan vise PM, entaun ita-nia preokupasaun iha buat rua, ida mak sei perturba ninia kna’ar no segundu nia bele utiliza rekursu estadu nian hodi ba promove nia-an liuhusi servisu ne'ebé sira halo”, afirma nia.
Ho ida ne'e sujere ba PP Taur atu suspende Armanda Berta husi kargu hanesan Vise PM no MSSI.
“Se di’ak liu (secara) jentel, nia bele rejigna-an, mais se nia la rejigna-an entaun husik konpeténsia ba Primeiru Ministru atu suspende nia pozisaun”, hatete nia.
Entretantu iha Lei númeru 7/2006, 28 Dezembru (Lei eleitorál kona-bá Prezidente Repúblika), artigu kona-ba inelejibilidade kandidataura ne'ebé labele kandidata ba Prezidente Repúblika mak hanesan, majistradu judisiáriu husi Ministériu Públiku ne'ebé efetivi-dade hala'o hela servisu.
Nune'e mós, kareira diplomata ne'ebé efetividade hala'o hela servisu, funsionáriu públiku ne'ebé efetividade hala'o hela servisu, membru Falintil-Forsa Defeza Timor-Leste (F-FDTL) ne'ebé efetividade hala'o hela servisu, membru polísia ne'ebé efetividade hala'o hela servisu, membru governu kualker relijiaun ka kultu, membru komisaun nasionál eleisaun (CNE). (*)
