"Sr. Dr. Mari Alkatiri mós hakerek karta ida ba ha'u iha loron 15 fulan ne'e hatete katak nia mandatu iha loron 31 jullu remata," dehan PM Taur Matan Ruak iha Palásiu Prezidensial Bairro Pite, Kinta (18/07/2019).
Xefi governu ne'e mós haruka ona karta ba Prezidente Repúblika kona-ba mandatu Mari Alkatiri nu'udar Prezidente RAEOA-ZEESM.
"Ha'u mós hakerek karta ida ba Prezidente Repúblika katak laiha intensaun ba estensaun mandatu Dr. Mari Alaktiri nian," PM Taur afirma.
Nia dehan, PR mós simu ona lei ne'ebé Parlamentu Nasionál altera kona-ba kompetensia PR nia hodi fó posse ba Prezidente RAEOA-ZEESM ne'ebé muda fali ba kompetensia PM nian.
"Alende ne'e, PR mós simu ona lei ne'ebé foin daudauk Parlamentu Nasionál halo alterasaun. Tanba ne'e, mak asuntu tolu kedas ne'ebé señor prezidente sei estuda pasu mai oin ne'e. Desizaun saida ita hein," PM hatete tan.
Hatán ba preokupasaun povu Atoni kona-ba lei n.3/2014 ne'ebé PN altera tiha ona, PM hatete, desizaun ba ida ne'e iha orgaun soberania nia liman.