Maibé Xefe Bankada KHUNTO, Olinda Guteres defende katak Ministru Transporte no Komunikasaun, José Agustinho, seidauk halo korrupsaun iha governu nia laran.
Deputadu CNRT Domingos Carvalho de Araújo hatete, kazu ro tranship II, iha loron 2 fulan-Marsu 2021, Bankada CNRT deklara ona iha Parlamentu Nasionál kona-ba deskoberta indisíu forte ba korrupsaun ne’ebé komete husi MTK José Agustinho da Silva tanba atu halo lalais kontratu hasa’e folin aluga ró husi nasaun Indonézia.
“Indisíus Forte Krime Korrupsaun Aluga Ró-Ahi KMB Tranship II husi Ministru Transporte no Komunikasaun”, dehan Deputadu Domingos liuhusi Deklarasaun Polítika iha plenária Parlamentu Nasionál (PN), segunda (21/06).
Husi Ró-Ahi ne’ebé MTK aluga, iha fulan-Juñu ne’e to’o ona iha Portu Díli ho naran KMB Tranship II Gresik ne’ebé mak iha loron (11/06) Primeiru Ministru ho ninia komitiva uza ba iha Atauro.
Antes Ró-Ahi ne’e hala'o ninia operasaun, dezde inísiu mosu ona reasaun maka’as husi públiku, liliu Komisaun “E” trata asuntu Infraestruturas Parlamentu Nasionál no Forum Oganizasaun Naun Governamental Timor-Leste (FONGTIL) ne’ebé ejize ba Komisaun Anti Korrupsaun (KAK) no Ministériu Públiku atu halo investigasaun.
Maibé, Ministru José Agustinho da Silva mos deklara ba públiku katak aluga Ró-Ahi deside ona iha Konsellu Ministru no selebra ona kontratu ho ho folin Rihun US$220, kada fulan.
Tanba, Ró-Ahi KMB Tranship II ne’ebé aluga husi Indonézia konforme husi fiskalizasaun Komisaun E Parlamentu Nasionál iha indisíus forte krime korrupsaun, tanba deskonfia iha prosesu aprovizionamentu no ajudikasaun mosu iregularidade barak no involve Ministru Transporte no Komunikasaun.
"Tuir informasaun ne’ebé ami rekolla iha 18 fevereiru 2021 katak fou-foun deside kontratu US$150 mil doláres, maibé derepente folin aluga Ró-Ahi Tranship ne’e sae ba US$220 mil”, dehan nia.
Aliende Ró-Ahi Tranship II, Komisaun E mós haree fizikamente Ró-Ahi ne’e la viável atu halo operasaun tanba sasán barak kesi de’it ho tali rafia, besik barak mak ferujen no dodok ona, oliu sai mákina Ró-Ahi, kadeira besi mamuk (la uza esponza) inklui mós idade téknika Ró-Ahi ne’e kleur ona tanba produsaun iha tinan 2007, produtu tinan 14 liubá nian.
Maske Ró-Ahi ne’e iha hela prosesu investigasaun KAK nian maibé Primeiru Ministru, Taur Matan Ruak sei iha korajen hodi uza ba viajen de traballu iha Ataúro iha loron 11 fulan-juñu, ne’ebé ikus mai halo públiku hakfodak tanba Ró-Ahi ida-ne’e defísil atraka iha Portu Atauro.
Tanba ne'e, solusaun ba kazu ne'e Primeiru Ministru mak bele hare’e no sente rasik, tanba kondisaun Ró-Ahi ne'e sei lori risku ba povu no pasajeiru Oe-cusse ho Ataúro no husu atu hapara operasaun.
Husu mós ba Komisaun Anti Korruosaun (KAK) no Ministériu Públiku atu investiga Ministru Transportes no Komunikasaun, investiga mós parte relevante sira-hotu iha prosesu aprovizionamentu no ajudikasaun Ró-Ahi KMB Tranship II ne’ebé fó ona prejuízu ba osan estadu.
Hatan ba kestaun ne'e Xefe Bankada Kmanek Haburas Unidade Nasionál no Timor Oan (KHUNTO), Olinda Guteres hatete, nia parte ko’alia bebeik ona katak atu habadak liafuan korrupsaun ro, di’ak liu Parlamentu halo xamada ba Ministru MTK, atu nune'e bele mai esplika.
Tanba membru governu no deputadu ne’ebé mak KHUNTO sumete ba tur iha kargu estadu atu servisu ba povu no seidauk halo korrupsaun.
"Ami KHUNTO ne'e seidauk halo korrupsaun, ami-nia liman ne'e seidauk foer dala ida, ami-nia Ministru tur iha fati-fatin, defende iha ne'e, ami ne'e seidauk halo korrupsaun”, hatete nia. (*)