Tempotimor (Dili)-Ministériu Obras Públika (MOP) liuhusi Bee Timor-Leste, empreza públiku (BTL,ep) aprezenta projetu hodi mellora infraestrutura drainajen no saneamentu iha kapitál Dili Ba Konsellu Ministru (KM).
Aprezentasaun ne’ebé halo iha KM, loron 26 fulan-maiu husi Ministru Obras Públikas, Salvador Soares dos Reis Pires no Prezidente Konsellu Administrasaun Bee Timor-Leste, Empreza Públiku (BTL, E.P.), Carlos Peloi dos Reis.
“Aprezenta ona projetu melloria infraestruturas drenajen no saneamentu Dili nian, ne’ebé hakarak fó resposta ba problema inundasaun sira no ba kapasidade drainajen nian ne’ebé daudaun ne’e la sufisiénte no falta manutensaun ba infraestrutura sira”, dehan Ministru Prezidénsia KM, Fidélis Magalhães, iha Ministériu Finansas, kuarta (26/05).
Tanba projetu ida-ne’e, sei aumenta kapasidade husi infraestrutura sira ne’ebé eziste no sei hari’i bazia sira retensaun nian iha fatin estratéjiku sira, atubele kontrola velosidade bee nian bainhira akontese udan boot. (*)
