"Ezemplu ema halibur malu barak iha Dili laran ne'e sé mak promove, ne'e sentru integradu jestaun kríze, imi ba cheek iha ministériu solidaridade sosial, ema halibur malu to'o ema sa'e moru ne'e kan estadu", dehan Diretór Ezekutivu FONGTIL, Daniel do Carmo Santos, hafoin partisipa reiuniaun iha Palásiu Prezidensiál, Bairopite, kuarta (26/05).
Tanba governu mak iha responsábilidade máximu atu kontrola, maibé laiha ona seriedade, ikus mai kontribui ba númeru kazu covd-19 aumenta.
"Transmisaun komunitária tama ona tanba governu liliu ministériu sira ne'ebé ha'u temi iha ne'e hanesan, ministériu solidaridade sosial no Ministériu saúde, liuhusi sentru integradu jestaun kríze, laiha seriedade atu aplika regra ida halibur malu”, afirma nia.
Bainhira governu laiha ona seriedade no la kompremetidu ho dedikasaun atu implementa regra sira ne'e, mak laiha ona autoridade ida.
“Festa ida iha Kolmera ne'ebá ne'e, sira-nia investigasaun to'o ne'ebé, kalan sira ba haree ema halo festa, maibé sira (polísia) la halo kapturasaun oinsá povu bele halo tuir sé estadu ne'e hanesan ne'e”, dehan nia. (*)