Vise Xefe bankada CNRT, Partocino Fernandes dos Reis hatete, dadauk seidauk bele fó komentáriu, tanba  sira seidauk hetan informasaun kona-ba prosesu ne'e.

“Humm, ha'u seidauk iha informasaun kona-bá ida ne'e, ne'e duni ha'u seidauk bele fó komentáriu ba ida ne'e”, deklara nia iha Parlamentu Nasional (PN), tersa (25/05).

Antes ne'e, Komandante Operasaun Nasionál PNTL, Superintendente Xefe, Pedro Belo informa, dadauk Polísia Serbisu Investigasaun Kriminál Nasionál (PNSIK) hasai ona karta hodi bolu abitante-sira atu presta deklarasaun ba polísia liga ba selebrasaun 20 maiu iha Masin-Lidun.

Tanba, asaun ne'ebé halo viola ona regra Estadu Ermerjénsia, no Serka Sanitária ka Konfinamentu Domisiliáriu iha Dili.

“Agora daudaun ami halo prosesu investigasaun ba ema-sira ne’ebé viola regra durante Estadu emerjénsia hamutuk na’in 253, tanba ema-nia konsiénsia laiha no lakohi kumpre regra,” deklara Pedro Belo iha Komandu Jerál PNTL, Kaikoli, segunda (24/05).

Maibé, Poizsaun PNTL sei kontinua halo sosializasaun ba regra sira iha sosiedade no husu atu sidadaun hotu kumpre, labele halibur-malu barak nune’e hamutuk kombate COVID-19.

“Saúde ne’e iha ita-nia liman rasik, tenke kuidadu-an, hanesan mós kuidade ita-nia família no sosiedade”, dehan nia. (*)