Eis Deputada Merita Alves hakotu nia peregrinasaun iha mundu, loron segunda (24/05) tuku 17.00 oras Timor-Leste (otl), no mate-isin oras ne’e rai hela iha nia rezidénsia Kuluhun de Baixo, Dili.

Ho ida ne'e, Xefe Bankada FRETILIN, Francisco Miranda Branco, husu Parlamentu Nasionál (PN) tenke fó votu pezar ikus ba saudoza Merita Alves tanba saudoza nu’udar deputada iha Asembleia Konstituente no feto ne’ebé barani iha prosesu luta ba libertasaun.

“Ami sei fó hanoin ba meza prezidénsia katak, Parlamentu Nasionál tenke iha ajenda atubele presta omenajen ikus ba saudoza Merita Alves”, dehan nia iha PN, tersa (25/05).

Istória Kontribuisaun luta ne'ebé saudoza halo iha ai-laran ne’ebé serbisu besik ho Gabinete Prezidente, Nicolau Lobato nian, tanba nia mós elementu ida-ne’ebé serbisu besik liu Prezidente Nicolau Lobato iha ai-laran.

Saudoza Alves mós nu’udar priozioneira ida iha prizaun Tjing Fa Ho (besik banku ANZ), tanba inimigu deteta saudoza serbisu hamutuk ho Gabinete Prezidente Nicolau Lobato nian iha prosesu luta ba ukun rasik-an.

Pozisaun bankada Fretilin observa, saudoza nia moris ne’e nakonu ho persegisaun, informasaun sira-ne’ebé kona-ba ai-laran nian, nia sempre envolve iha laran. Nia la’ós membru Asembleia Konstituente ne’ebé halo konstituisaun, maibé ema ida-ne’ebé hanesan feto ida espesiál, feto ida-ne’ebé nakonu ho korajen tanba nia mós subar rezisténsia barak, ida mak Somotxo.

“Tanba deputadu Somotxo ne’e hela iha nia uma kleur durante períodu rezisténsia”, deklara nia. (*)