Kampu Serbisu Rihun 60, Kritika no Korajen husi Deputadu PN Featured

Tempotimor (Dili) Promesa Governu Konstitusional Daualu kona-ba kampu serbisu rihun 60 kada tinan sai alvu kritika. Deputadu sira iha Parlamentu Nasionál (PN) mós lakohi lakon. Mosu kritika husi deputadu opozisaun no klaru katak deputadu husi AMP mosu hodi fó korajen.

Deputadu husi Bankada FRETILIN, Joaquim dos Santos dehan programa kria kampu serbisu rihun 60 kada tinan nu’udar materia eleitoral AMP nian ne’ebé hakarak atu implementa bainhira hetan fiar husi povu hodi kaer governu.

Maibé hafoin kaer governu, deputadu ne’e dehan, governu ne’ebé lidera husi Primeiru Ministru Taur Matan Ruak seidauk hatudu rezultadu husi promesa refere.

“Agora liu tiha tinan ida ona, husu to’ok ba sira, sira kria ona (kampu serbisu) hira?, tanba (kampu serbisu) ida agora la’o hela ne’e ida ne’ebé uluk la’o tiha ona ne’e. Promesa ne’e kumpri ona ka seidauk… husu to’ok ba Ministru Fidelis Magalhães no Primeiru Ministru Taur Matan Ruak,” dehan Joaquim iha Komisaun Nasionál Eleisaun, Kaikoli, Kinta (27/06).

“…la hatene (kampu serbisu) 60.000 kada tinan ne’e empregu sira atu kuda iha ne’ebé, kuda iha tasi laran, petroleum, ka kuda iha rai maran, agrikultura?”, nia husu.

Iha parte seluk, Vise Prezidente Parlamentu Nasionál Maria Anjelina dehan, polítika loke kampu serbisu 60.000 kada tinan ne’e polítika governu nian oinsa hamenus ki’ak inklui reduz dezempregu iha Timor Leste.

Maibé, tuir nia, governu daudauk ne’e sei konsentra hela ba asuntu nasionál no membru governu ne’ebé pendente.

“Membru governu pendente ne’e iha ligasaun direitamente ba kestaun ida oinsa loke empregu ba Timor-oan sira, ne’ebé ha’u hanoin governu iha pozisaun di’ak liu esplika asuntu ida ne’e.” dehan Maria

PN, nia hatete, kontinua fó korajen ba governu atu buka solusaun, liu-liu kontinua halo diskusaun ho Prezidente Repúblika hodi rezolve membru governu pendente.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com