Ministru Prezidensiá Konsellu Ministru, Fidélis Leite Magalhães hatete, governu deside suspende, tanba haree ba populasaun Munisípiu Dili maioria afeita ba inundasaun.
"Konsellu Ministru deside atu suspende inpózisaun konfinamentu domisiliáriu obrigatóriu jerál ba populasaun iha Munisípiu Dili to'o governu deside filafali. Konfinamentu domisiliáriu obrigatóriu la eziste ona iha Munisípiu Dili, tanba situasaun inundasaun ne'ebé mak ita rnfrenta hela, ita hatene sidadaun barak mak tenke muda fatin, no sira ne'ebé fó apoiu mós tenke fó apoiu ba malu”, informa nia liuhusi konferensia impresnsa, hafoin reuniaun Konsellu Ministru iha palásiu governu, kinta (08/04).
Ho rezolusaun ne'e mós fó oportunidade atu loke dalan ba vítima inundasaun atbele asesu ba nesesidade hirak ne'ebé dadaun presíza tebes iha moris loroloron nian.
"Ho ida ne'e loke dalan ba negósiu sira loke fali iha Munisípiu Dili, hirak ne'ebé mak fa'an ropa, obralan sira, no sasán sira ne'ebé importante ba moris nian bele funsiona fali, no transporte públiku sira hanesan Taxi, Mikrolet mós bele funsiona fali”, deklara nia.
Maibé, rezolusaun ne'e mós fó limitasaun katak, atividade misa, no prosesu aprendizajen seidauk iha autórizasaun atu hala'o, tanba akumula ema ho númeru boot.
"Maibé, serka sánitaria ba Munisípiu Dili sei permanente, sé mak hakarak dezloka ba Munisípiu, ninia dalan mak tenke Sentru Integradu Jestaun Krize, halo teste antes ba, hirak ne'ebé komprova negativu mak bele ba”, klarifika nia.
Maske deside fó autórizasaun ba atividade la'o normál fali, maibé husu ba hothotu atu nafatin kumpri regra prevensaun Covid-19 nian. (*)