Tanba ne'e, ulun boot CNRT, ejize Ministériu Públiku (MP) atu fó notifikasaun ba nia hodi sai argidu iha Tribunal, maske MP la fó notifikasaun ba nia.
"Tan ne’e, ohin, ha’u ba fó hatene ba Ministériu Públiku katak, ha’u ezije atu sai arguidu, no la'ós hanesan ‘sasin’ ka testemunha, tuir karta ne’ebé ha’u hakerek ona ba Procurador-Geral da República, Dr. José Ximenes no ba Procurador, Dr. Adérito António Pinto Tilman, nebé iha fulan-janeiru no fevereiru kaer hela asuntu ne’e”, dehan nia liuhusi konferensia Impresnsa iha edifísiu GMN TV, Bebora, segunda (29/03).
Xanana obriga MP ne'e, ligadu ho keixa ne'ebé Sekretáriu Jerál Partidu FRETILIN, Mari Alkatiri halo ona hasoru kuadru no membru CPN-CNRT.
Iha notifikasaun ne'ebé antes ne'e, MP fó ba líder nasionál Xanana Gusmão hodi sai testamuña ba keixa ne'e bainhira halo julgamentu.
Xanana ejize, tanba parte nia mak fó orientasaun ba membru CPN, hodi foti kestaun subornu husi Conoco Philips ba Mari Alkatiri, la'ós sira-nia inisiativa rasik.
Tanba, iha Kódigu Prosesu Penal, iha Seksaun IV, kona-ba Prova Testemuña, iha ninia Artigu 124º., kona-ba impedimentu, dehan ‘Ema ne’ebé tama iha prosesu ida, hanesan arguidu ka lezadu, labele fó depoimentu iha prosesu ne’e.
Nune'e mós, tuir Kódigu Prosesu Penal ninia Kapítulu VI, kona-ba Suspeitu, arguidu no Kondenadu, iha ninia Artigu 59º. Kona-ba Konstituisaun hanesan Arguidu, iha ninia númeru 1, dehan ‘Hetan kualidade hanesan arguidu ema ne’ebé hasoru akuzasaun iha prosesu penal.
Xanana hakarak sai arguidu ba hatán iha Tribunal no lori prova kona-ba subornu ne’e. Tanba kazu subornu ne’e, sai tiha ona koñesimentu públiku, dezde tinan 2004/2005, la'ós buat foun ida.
"Durante prosesu negósiasaun Fronteira Marítima ho Austrália, iha Komisaun Konsiliasaun, ha’u sempre lori dokumentu Conoco Philips nian ne’e, preparadu atu hatudu karik presiza. Ha’u mak halo akuzasaun kontra Dr. Mari katak nia simu suborno husi Conoco Philips, tan ne’e Ha’u tenke sai arguidu”, Xanana ezije.
Ho razaun hirak ne'e, Xanana hein Ministériu Públiku bolu fali nia nu'udár arguidu, hodi aprezenta ona evidénsia, nune’e Tribunal bele bolu ba hatán. (*)
