Maibé, durante ne'e sira organiza enkontru liuhusi zoom hodi nafatin halo koordenasaun ho kooperativa sira, atu limita ema iha servisu fatin.
"En-prinsípiu iha SEKOOP ne'e funsiona nafatin, maibé partisipasaun ema nian iha diresaun ida ami limita na ema na'in-tolu ka haat, labele liu ida ne'e, i sira seluk presiza atu ajuda karik, hein superior sira bainhira kontaktu mak sira mai”, hatete Elizário Ferreira ba www.tempotimor.com iha kna'ar-fatin Akait, segunda (29/03).
Limitasaun ne’e halo, bazeia ba despaixu ne'ebé sekretáriu Estadu rasik hasai, bainhira konfinamentu aprovadu, hodi limita provizóriu prezensa funsionáriu sira nian, maibé ba kargu xefia sira nafatin hala’o kna'ar atu kontribui ba servisu hodi labele hamate atividade kooperativa nian.
Maske nune'e, ba movimentu kooperativa sira iha Suku ho Postu administrativu sira, SEKoop fó orientasaun ba sira atubele hala'o nafatin atividade, maibé presiza regra prevensaun Covdi19 husi MS ho OMS nian hanesan uza máskra, halo distansiamentu fíziku no sosial.
"Nune'e mós ba sira ne'ebé hala'o prosesu distribuisaun ai-hán sesta bázika. Iha semana rua ba kotuk la halo distribuisaun tanba kompaña sira hasoru problema ho sira-nia kapital finanseira, e agora iha kompaña ida ka rua foin mak hahú distribuisaun filafali iha semana kotuk”,dehan nia.(*)