Reiuniaun KSDS no KE ne’ebé hala’o iha loron segunda (29/03) ko’alia kona-ba renovasaun EE, hodi bele prevene pandemia Covid-19 iha rai laran.
Asesor Polítiku Prezidente Repúblika, Gregório Sousa hatete, reuniaun rua husi KSDS no Konsellu Estadu ho Prezidente atu ko'alia kona-ba renovasaun Estadu Emerjénsia.
"Desizaun imi hatene ona tanba kazu Covid-19 aumenta loron ba loron nune'e membru KSDS no KE dehan atu halo renovasaun Estadu Emerjensia”, dehan asesor PR molok enkontru ho Prezidente Repúblika iha Palásiu Prezidensial Bairru Pité, segunda (29/03).
Ho ida ne’e, Prezidente Repúblika Francisco Futerres ‘Lú Olo’ sei haruka mensajen ba Parlamentu Nasionál, koordena ho sira no iha loron kuarta (31/03) sei debate iha reuniaun Konsellu Estadu.
Iha loron 29 fulan-marsu tinan 2021, Konsellu Ministru hala’o sorumutuk liuhusi vídeokonferénsia no, hafoin halo análize ba aprezentasaun husi koordenadór sira husi Sentru Integradu Jestaun Krize (CIGC) kona-ba pontu situasaun epidemiolójika nasionál, aprova ona projetu Dekretu Governu nian ba alterasaun dahuluk ba Dekretu Governu nu. 6/2021 loron 2 fulan-marsu, kona-ba Medida Ezekusaun Deklarasaun Estadu Emerjénsia ne’ebé efetua husi Dekretu Prezidente Repúblika nian nu. 15/2021, loron 1 fulan-marsu, tama iha vigór to’o tuku 23:59 iha loron 2 fulan-abril tinan 2021. (*)