Prezidente Parlamentu Nasionál, Aniceto Guterres, hateten implementasaun regra ida-ne'e sei hahú iha kinta, 11 fulan marsu 2021.

"Komesa bainrua, deputadu, funsionariu, atu se se de'it, mesmu ema husi li'ur kuandu tama mai iha parlamentu laran ne'e molok tama mai, husi purtaun ne'e tenke halo kedas teste ba temperatura," dehan nia iha Parlamentu Nasionál, tersa (9/3).

Medida ida ne'e sei implementa tanba dadauk parlamentu iha ona ekipamentu ne'ebé apoia husi Organizasaun Mundiál Saúde (OMS).

Tanba ne'e, sei fó kompeténsia ba ekipa seguransa sira mak sei halo ida-ne'e, nune'e, bele kontrala covid-19 labele da'et ba área parlamentu nian.

Nudar orgaun lejizlador, deputadu Aniceto espera no hein katak deputadu sira bele kumpri regra sira-ne'e hotu, liu-liu regra espesiál ne'ebé Parlamentu Nasionál hasai hanesan protokolu, distansiamentu sosiál, ijiene no sira seluk.(*)