Vise-Xefe Bankada CNRT, Deputada Patrocínio Fernandes, hatete lockdown ne'ebé governu kria ne'e tanba haree ba kazu importasaun COVID-19 iha aumentu maibé bainhira suspende movimentu sidadaun sira nian maka, governu tenke buka ona solusaun ruma atu solusiona nesesidade opulasaun sira-nian.
Nia dehan, ko'alia kona-ba númeru kazu komesa sa'e, depois hetan informasaun katak iha ona posibilidade ba transmisaun lokál ba COVID-19 ne'e.
"Kona-ba nesesidade ne'e kabé ba kompeténsia governu nian para depois buka solusaun oinsá," dehan nia iha Parlamentu Nasionál, kinta (18/2).
Nia hatutan, bainhira governu halo lockdown ka limitasaun ba ema-nia movimentu, buat sira ne'e hotu governu tenke iha obrigasaun oinsá mak fó solusaun, tanba konsidera buat sira-ne'e nu'udar konsekuénsia husi desizaun estadu.
Iha fatin hanesan deputadu bankada FRETILIN, José Agustinho Siqueira 'Somotxo' haktuir, desizaun governu hodi suspende direitu liberdade ka limita movimentasaun iha munisípiu Bobonaro no Covalima nu'udar asaun ida atu prevene transmisaun COVID-19 labele tama mai Timor-Leste.
"Ne'ebé lockdown ne'e la'ós di'ak ba governu de'it maibé nia di'ak ne'e mai timoroan hotu," dehan nia.(*)
