Vise-Xefe Bankada CNRT, Deputadu Patrocínio Fernandes haktuir, bankada prontu responsabiliza ba aktu saida de'it bainhira hetan notifikasaun husi Ministériu Públiku.
Nia ko'alia ne'e tanba Iha loron 16 fulan fevereiru, Prezidente Partidu CNRT Kay Rala Xanana Gusmão, hato'o ona deklarasaun ida hodi kestiona kona-ba deklarasaun Prokuradór Jerál Republika (PJR) ne'ebé dehan atu notifika mós deputadu bankada CNRT na'in-21 iha Parlamentu Nasional.
Ne'e duni, deputadu patrocínio hatete, sé Ministériu Públiku halo notifikasaun no Parlamentu Nasionál mos halo levantamentu maka bankada CNRT sei responsabiliza.
"Ha'u hanoin ami halo ona deklarasaun fila-fila, katak bainhira ami halo asaun ida ami hatene katak saida mak atu mosu. Ne'ebé, iha-ne'e bankada CNRT prontu atu responsabiliza saida mak iha," dehan nia iha Parlamentu Nasional, kinta (18/2).
Nia mos defende direitu membru komisaun politika nasional partidu CNRT na'in-hitu, maski hetan ona TIR maibé seidauk iha prosesu kontinuasaun.
Tanba ne'e membru CPN-CNRT uza sira-nia diretu ejize aselera prosesu kontinuasaun, maibé la'ós atu dada hela prosesu ida ho TIR depois laiha solusaun no laiha prosesu.(*)
