Ba kestaun ne'e, Deputadu Bankada FRETILIN Jose Agustinho Siqueira 'Somotxo' konsidera atetude ne'ebé hatudu husi sidadaun na'in-rua ne'e katak sira laiha morál no laiha responsabilidade atu kuidadu nasaun.

Deputadu Somotxo dehan tuir loloos iha momentu sira hanesan ne'e sidadaun ida-idak tenke kontribui no sakrífika-aan hodi kuidadu nia família, inklui kuidadu nia povu, atu labele hetan da'et ba moras COVID-19.

"Kazu konkretu ida maka iha Bobonaro, hanesan iha Maliana dehan ita-nia sidadaun ba hakoi ninia família matebian ruma iha Atambua, fila fali mai sa'e hamutuk anguna ho ema na'in-11," dehan nia iha Parlamentu Nasionál, kinta (18/2)

Nia husu komunidade sira iha fronteira komesa husi Mota-ain ba mota masin, inklui Oekusi tomak ne'e tenke sente sira-nia responsbilidade, nu'udar devér no obrigasaun atu kontribui hanesan trava moras ne'e labale tama mai.

Nia parte preokupa tanba wainhira moras COVID-19 maka to'o ona iha fronteira sira maka ema hotu defísil tebes atu halo movimentasaun ba munisípiu rua ne'e.

Kona-ba Sistema kontrolu ne'e, nia rekoñese forsa ho polísia ne'ebé asegura fronteira ne'e sei menus duni maibé responsbilidade atu kombate no preve moras covid labelee tama iha Timor-Leste ne'e responsabilidade la'ós ba polísia no militár de'it, maibe responsbilidade komunidade tomak.

"Ida-ne'e mak fó hatene ba públiku, liuliu munisípiu rua hanesan Covalima no Bobonaro, tanba dalaruma supermie kaixa ida mak ita ba tama iha-ne'ebá, lori moras ne'e mai ne'e ita-nia moras ne'e iha ne'ebé," nia rekomenda.(*)