Joao Nino Sarmento Lay ne’ebé uluk hetan mós kastigu iha Ataúru ne'e katak, durante ne'e, estadu seidauk rekoiñese desterradu Ataúru.

"Agora mak fóin atu harii, durante ne'e estadu seidauk rekoñese, agora ba oin husu par estadu apoiu", Joao Nino Sarmento Lay hateten lia hirak ne’e hafóin partisipa atividade ida ne’ebé realiza husi desterradu Ataúru sira iha salaun Ministeriu Solidariedade Sosial no Inkluzaun MSSI Kaikoli, Domingu (20/12).

Nia konta tuir katak, komunidade ne’ebé ba kastigu iha Ataúru ne'e, tanba Militar Indonezia deskonfia apoiu han-han ba Falintil iha ai-laran.

"Naton ami ba ne'e akontesimentu 10 de juñu 1980 iha Dare, tanba iha ne’eba deskonfia dehan, ita mak fó han maluk sira iha ai-laran. Prontu depois de kaer ema hotu tenkeser kaer aman mak ba uluk, depois tuir fali kaer inan ho oan ba hotu", nia esplika.

Nia haktuir, momentu lori komunidade hirak ne'e ba Ataúru hahan laiha, han de'it batar fóhuk no hahan ne’ebé la diak de'it, liu tihan tinan ida hanesan ne'e mak, Crus Vermelha Internasionál nian tun, fóin mak hetan ajudu.

"Fóu-fóun ba ne'e mós ema bapa sira lori ami mai sulan hotu iha kodim Dili nian ne'e, depois kalan mak tula sai ho Ro ba Ataúru, maibe iha momentu ne’eba ami mós la hatene, ema tula ami ba atu oho ga! atu lori ba soe tasi ga! no fim la jadi oho no soe lori ba Ataúru", nia tenik.

Nia mós dehan, komunidade ne’ebé kastigu iha Ataúru, militar indonezia sira baku, estraga Feto sira no balun lori lakon to'o agora buka lahetan.

"Ami nia maluk na'in hira ida, ema tula fila-fali mai mais la hatene lori mai oho ga lori ba iha ne’ebé, ami fila mai buka mós la hetan ona to'o agora", nia haktuir ho triste.

Durante iha Ataúru, nia konta tan, hahu husi 1980 to'o 1985 hafóin fila mai Dili, nune'e agora halibur malu fali dadur Ataúru nia oan ho sira ne’ebé dadur kedas ne'e atu harri fali komisaun ida.

Tanba, seidauk iha rekoñesimentu husi estadu, entaun agora halibur malu hodi husu apoiu ruma.

"Ami so rekomendasaun ba governu ne'e, hanesan ne'e de'it, ami kastigu ba Ataúru ne'e la'os naran ba kastigu de'it, tanba ita nia funu mak ami ba kastigu iha Ataúru, ne’ebé governu mós tenke hatene no haree, tanba iha 10 de juñu mak ema kuaze 12 distritu ba kastigu iha Ataúru, ema rihun 7.600- resin kastigu iha ne’eba, maibe barak mak mate iha neeba, balun fila mai mais agora mate tiha ona", nia rekomenda.

Nia husu apoiu ba estadu, tanba balun ne’ebé uluk la dun fó kontribuisaun ba prosesu independensia Timor-Leste nian hetan apoiu, maibe desterradu Ataúru la hetan.

"Iha komisaun balun, loron rua-rua de'it mós nia veteranus, maibe ida durante kastigu tinan barak ne'e laiha, nunka hetan buat ida, ne'e mak ami hakarak harii rasik atu husu ba governu fó apoiu ba desterradu Ataúru, tanba iha Ataúru ema barak mós mate", nia husu tan.

Joao Nino Sarmento Lay ne’ebé hetan mós kastigu iha Ataúru tanba funu, moris iha loron 2 Fulan janeiru tinan 1969, suku Dare, Postu-administrativu Vera Ceuz, Munisipiu Dili. (*)