Diretór Jerál Protesaun Sivíl Superintendente Ismael Babo hateten, SEPS hamutuk ho FAO halo ona validasaun ba peskiza ne'ebé parte rua halo liu-liu matadalan ba prevensaun dezastre naturais nian.

"Workshop ida ohin ne'e atu halo validasaun ba estudu kle'an no elabora husi SEPS liu-liu iha diresaun jestaun risku naturais hamutuk ho FAO inklui Ministériu Agrikultura, ministériu sira seluk no ajénsia internasionál sira ne'ebé eziste iha Timor-Leste," Ismael Babo hateten iha edifísiu Ministériu Finansas (MF) Aitarak Laran Dili, Kuarta (9/12).

Nia mós dehan, matadalan ne'ebé governu hamutuk ho organizasaun internasionál sira halo ne'e relasiona ho komunidade nia moris real ne'ebé akontese iha Timor-Leste.

"Ita-nia sosiedade tenke reziliente ba sira-nia aan, depois matadalan ne'e mós loke dalan ba autoriedade lokál sira atu sira bele reuni sira-nia rekursu nune’e, bainhira mosu dezastre naturais, sira bele reuni hodi apoia malu sein husi nasionál no munisípiu sira," nia dehan.

Babo akresenta, dezastre naturais akontese bei-beik ne'ebé TL mós hola parte ba vulneravél dezastre naturais nian, entaun husi giaun ne'e atu eduka sidadaun sira mak sai parseiru di'ak ba protesaun sivíl liu-liu iha prevensaun dezastre naturais nian.

Matadalan ne'ebé SEPS hamutuk ho FAO elabora ne'e liga ba giaun sandai ne'ebé deklara husi Nasoens Unidas nian fó ba redusaun dezastre naturais.

Iha fatin hanesan, reprezentante FAO Paula Lopes da Cruz hateten, durante ne'e asesu buat barak iha komunidade, entaun preokupasaun barak liu mak kona-ba mudansa klimátika, rai monu no seluk tan.

"Entaun ami tuur hamutuk ho diresaun jestaun risku dezastre tau dadus sira ne'ebé iha ne'e hamutuk hodi produz sai matadalan nasionál ida hodi tulun seitór no parseiru hotu-hotu ne'ebé servisu iha área jestaun risku dezastre naturais ne'e nune’e uniformiza apoiu sira ne'e ba komunidade," Paula hateten.(*)