Tuir informasaun ne’ebé www.tempotimor.com, asesu iha pájina TradeInvest Timor-Leste, segunda (01/08) katak, Sekretariu Estadu Protesaun Sivíl, Joaquim José Gusmão dos Reis Martins akompaña husi reprezentante Vise Ministru Interior, Francisco Soares, Segundu Komandante Jerál PNTL, Komisáriu Mateus Fernandes fó pose ba estrutura Komandu Operasaun Nasionál, Regionál, Munisipál, Diretór Nasionál, Xefe Departementu no Seksaun sira hamutuk 258 iha Autoridade Protesaun Sivíl.
Prezidente Autoridade Protesaun Sivil, Superintendente Ismael da Costa Babo hatete, implementasaun kargu diresaun no xefia sira iha protesaun sivíl bazeia ba akta reuniaun númeru 1-12 ne’ebé estabele tuir estrutura nomeasaun prezidente APC no Despaxu númeru ref: 023 Gab.Apc/MI/VII/2022 ne’ebé hetan aprovasaun husi Sekretáriu Estadu Protesaun Sivíl, iha loron 21 fulan-jullu 2022.
Ho ida-ne’e marka istória foun ba Protesaun Sivíl ne’ebé dahuluk hala’o pose dahuluk ba estrutura kargus diresaun no xefia sira iha nasionál nomós munisipál.
“Mai ita hamutuk sai unidu no ida de’it hodi esforsa dedikasaun no ispíritu atu nune’e bele servi povu, estadu, Governu no nasaun Timor-Leste ho profesionalizmu no protesaun sivíl ba ita hotu”, dehan nia.
Seremónia primeiru pose ne’e hetan partisipasaun husi Prezidente Autoridade Munisípiu Dili, Guilhermina F.S. Ribeiro, Amu Kapelaun PNTL, Nelinho Americo Fereira Soares, emposadu, funsionáriu sira inklui família no partisipante sira seluk. (*)