KSTL Ezije Hasa’e Saláriu Minimu Traballador ba $200 Featured

Tempotimor (Dili); Klibur Traballadór Timor Leste (KSTL) ezije ba Governu atu hasa’e saláriu minimu traballador husi $115 ba $ 200, hodi kontribui ba ekonomia familia nian.

“Ami nia ezijensia mak saláriu $115 ne’e tenke hasa’e ba iha $200 para bele para hasa’e ekonomia traballadór sira nian," dehan Prezidente KSTL, Ramalho da Costa, iha Dili, Kuarta (1/5).

Nia hatutan, to’o agora Timor-Leste seidauk aplika polítika ida bem estar no bem servisu ne’e iha instituisaun Governu no privadu sira.

KSTL lakohi atu instituisaun Governu no privadu sira halo diskriminasaun ba traballadór sira, tanba ohin loron traballadór barak mak sai vítima ba impaktu polítika ne’ebé la’o iha durante tinan rua nia laran, to’o empreza balun taka tanba laiha vensimentu inklui hapara traballadór sira.

Entretantu traballadora, Florinda Martins husi munisipiu Ermera, sente triste tanba saláriu ne’ebé kada fulan hetan la sufisiente ba familia uma laran, inklui atu selu ba alin sira nia eskola.

“Trieste tanba ha’u nia saláriu ne’ebé ha’u hetan kada fulan $120, ida ne’e la sufisiente ba ami-nia familia, tanba alin sira eskola depois apoiu mós ba uma laran, entaun la sufisiente ba ami, entaun ami husu ba governu atu aumenta ami-nia saláriu”, tenik nia.

Rate this item
(0 votes)
Last modified on Friday, 03 May 2019 11:00
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.