Karta refere haruka ba sekretaria jeral PN ohin tersa (24/11), maizumenus tuku 10:30 OTL ho kontiúdu husi karta ne'e, prezidente PN husu Imediatamente ba Cedelizia atu husik ona kargu sekretaria Jerál PN nian, ne'ebé mak durante ne'e nia okupa.

Sekretária Jerál ne’ebé simu pose, ninia estatutu la’ós atu sai funsionária públika, tanba ninia karáter nomeasaun polítika nafatin no ninia prosesu mak tuir konkursu públiku.

Bazeia ba Lei Organizasaun Funsionamentu Administrasaun Parlemetár (LOFAP) garante mandatu sekretaria Jeral PN atu hala’o durante tinan lima, maibé realidade ida ne'e la akontese.

Tuir sekretaria Jeral PN, Cedelizia Faria Dos Santos hateten, ohin nia parte simu ona karta ida husi prezidente PN, ne'ebé husu imediata atu husik kargu ne’e.

"Ha’u simu duni karta ida husi Prezidente Parlamentu Nasionál, Aniceto Guteres ne’ebé, husu ha’u atu sai agora kedas," Cedelizia hateten ba jornalista tempotimor liu husi telefone, Tersa (24/11).

Tuir fontes konfirmadu husi gabinete Prezidente Parlamentu Nasionál hateten katak, tuir loloos Prezidente PN Aniceto Guterres hasai ona Cedelizia iha momentu Aniceto eleitu nu’udar Prezidente PN tamba bazeia ba lei númeru 12/2017/24 fulan maiu (LOFAP) artigu 23 hateten katak, Prezidente Parlamentu iha kompeténsia atu nomeia no ezonera sekretária jerál PN.

“Ezonerasaun ne’e normal, tanba Prezidente PN atuál mai husi partidu FRETILIN ne’ebé agora daudaun la’o hela iha Plataforma ida hamutuk ho PLP no KHUNTO. Tanba ne’e Prezidente PN presija atu nomeia fali ninia ema ne’ebé nia konfia”, fontes ne’e hateten ba tempotimor liuhusi telefónika.

Fontes ne’e mós hateten katak, eis sekretariu jerál PN Adelino Afonso de Jesus mak sei troka Cedelizia hodi assume hikas mandatu hodi fó apoiu ba Prezidente PN Aniceto Guterres.

Entretantu, eis Prezidente Parlamentu Nasionál (PN), Arão Noe Amaral fó pose ba Sekretária Jerál PN, Cedelizia Faria dos Santos, iha loron 13 setembru 2019. (*)