Liga ba prezensa membru governu na’in 14 ne’ebé konvoi iha vizita xefe estadu ne’e, jornalista www.tempotimor.com halo konfirmasaun ho Ministra Saúde (MS) Odete Maria Freitas Belo hateten, Membru Governu hirak ne’e tenke ba duni tanba iha ligasaun ho sira idaidak nia servisu.
"Membru governu barak mai tanba vizita ida ne'e iha ligasaun ho servisu ministru sira nian”, Ministra Odete hateten ba www.tempotimor.com iha EBC 10 Abril 1999 Gleno-Ermera, Kuarta (18/11).
Governante ne’e fó ezemplu hanesan Ministru Agrikultura no Peskas ne’ebé marka prezensa iha vizita ne’e tanba durante vizita ne’e ekipa mós halo promosaun ka promove ai-han produtu lokál nian.
“Entaun, ami hare ida ne'ebé mak bele promove hahan ba ospitál sira, tanba ita hakarak hahan husi lokál nian, ita la presiza ba hola tan ayam potong no seluk tan, maibé ita bele foti husi produtu lokál sira ne'e," nia hateten.
Durante vizita ne’e, Prezidente Repúblika (PR) Francisco Guterres Lú Olo no espoza Cidália Mouzinho hala'o vizita mós ba eskola no sentru produsaun sira inklui halo diálogu ho povu Ermera.
Entretantu membru governu ne'ebé partisipa iha vizita traballu PR Lú Olo no espoza nian mak hanesan Vise daruak Primeiru Ministru no Ministru Ordenamentu Teritoriál (MOT) José Reis, Ministru Petroleum no Minerais (MPM) Victor da Conceição, Ministru Asuntu Parlamentár no Komunikasaun Sosiál (MAPKOMS) Francisco Jerónimo, Ministru Asuntu Kombatentes Libertasaun Nasionál (MAKLN) Júlio Sarmento "Meta Mali", Sekretáriu Estadu Terras no Propriedades (SETP) Mário Ximenes, Ministru Administrasaun Estatál (MAE) Miguel Pereira de Carvalho, Sekretáriu Estadu Arte no Kultura (SEAK) Teofilho Caldas. Ministra Saúde (MS) Odete Maria Freitas Belo, Ministru Edukasaun Juventude Desportu (MEJD) Armindo Maia, Ministru Koordenadór ba Asuntu Ekonomia (MKAE) Joaquim dos Santos, Ministru Turizmu Komérsiu no Indústria (MTKI) José Lucas do Carmo da Silva,
Ministru Obras Públika (MOP) Salvadór Pires, Sekretáriu Estadu Ambiente (SEA) Demétrio Amaral, Sekretáriu Estadu Juventude no Desportu (SEJD) Abrão Saldanha. (*)
