“Tanba iha ona era dijitalizasaun, ami mós iha projetu ne’ebé tenke realiza iha 2021, ne'e maka torre 6 tan atu harii iha Timor”, Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo hato’o asuntu ne’e durante hala'o audiénsia públika ho deputadu Komisaun A iha sala konferénsia PN, segunda (09/11).

Nia hateten, torre hirak ne'e sei hari'i iha munisípiu 6 hanesan, Maliana sei tau iha Bobonaro, Ermera sei harii Lalinlau, Ainaro hari'i iha Hornaru, Baukau iha Triloka, Lospalos hari'i iha Naunil, no Vikeke iha Ossu, Monte Perdidu nia tutun.

“Eestudu biabilidade la’o namanas hela, ami sei hasoru malu ho komunidade oinsá mak atu haree iha parte kultura nian ho parte hotu-hotu, atu bele halo nusá maka iha novembru ne'e estudu remata ho ninia aprezentasaun posibilidade bele hari'i tan ida iha Monte Perdidu”, nia informa.

Nia esplika, projetu hirak ne'e harii ho ninia pakote tomak, kompostu kedas ho torre, uma-rua hodi tau jeradór ho matériál sufistikadu sira mak iha relasaun ho montajen, depois sei haree mós estrada neebé hahú uluk ho fera hodi hala’o de'it hanesan baibain atu bele liu, no 2022 mak sei tau alkatraun.

Alende ne'e, sei hari'i mós eletrisidade no fibra óptika bele instala to'o iha fatin ne’ebá tenke iha liña internet atu bele to'o iha ne’ebá tanba buat dijitalizasaun hotu-hotu tenke iha ligasaun ho internet.

“Projetu ida ikus liu, ne'ebé atu harii uma iha Díli (Ai-mutin) Uma edifísiu ba RTTL no Ajénsia Tatoli ne'ebé maka sira iha MAPKOMS nia okos no ami atu halo ida ne'e, tanba estudu biabilidade agora hahú hela tender ba 2021, no ami iha obrigasaun atu haka'as hodi bele realiza saida mak ami tau ona iha projetu ne'e”, tenik nia.

Entertantu, programa hirak ne'e tama hotu iha grandes projetus, mai hotu husi fundu infra-estrutura nian, no torre 6 nia fundu mai husi Ajénsia Dezenvolvimentu Nasionál (ADN) maibé ADN haruka fila-fali ba ministériu mak haree hodi halo servisu.