Situasaun ne’e foin primeira vez akontese tanba dezed primeira lejislatura to'o kuarta lejislatura laiha deputadu ida mak kadeira “lakon” iha plenária.
Tuir observasaun www.tempotimor.com iha terenu nota katak, iha prosesu diskusaun nia laran, bainhira deputadu Adriano do Nascimento atu hola fatin hodi tuir diskusaun, maibé derrepente deputadu nia kadeira laiha.
"Ha'u-nia kadeira laiha ne'e," Adriano hateten ho lian makaas iha plenária PN, Sesta (6/11).
Deputadu Adriano levanta kedas kestaun ne’e no sekretária Parlamentu Nasionál tun direitamente ba iha plenária hodi buka solusaun, maibé buka tun sa'e kadeira ne’e mosu fali iha fatin konvidadu sira nian.
Bainhira funsionáriu sira hetan hikas deputadu nia kadeira, lori kedas ba deputadu nia fatin hodi bele tur atu tuir diskusaun iha sala plenária.
www.tempotimor.com mós akapta deputadu Adriano nia liafuan badak kona-ba kadeira ne'ebé ba mosu fali iha kareira konvidadu sira-nian.
"Keta iha intensaun ruma karik!!!" nia kestiona.
Hafoin situasaun ne'e akontese, jornalista sira koko atu konfirma ho Sekretária Jerál Parlamentu Nasionál Cedelizia Faria dos Santos, maibé nia parte lakohi fó komentáriu.