Tuir Sekretáriu Jerál partidu Frenti-Mudansa, Cesar Vitál Morreira, prosesu pagamentu hotu tenke hala'o liuhusi sistema, la'ós osan ministériu simu, halo kedas transferénsia.

"Tuir loloos, governu tenke halo uluk preparasaun no re-ajustamentu ba dokumentu sira atu bele halo prosesu pagamentu, no mínimu fulan ida resin to'o fulan rua para bele halo pagamentu ba dividas sira, inklui mós iha programa ba rekoperasaun ekonómika nian," dehan Cesar iha Aimutin, Dili, Sesta (9/10).

Maibé haree ba komprimisiu governu nian ne'e, halo Sekretáriu Jerál partidu Frente Mudansa ne'e la fiar governu daualu, tanba OJE 2020 nian billaun $1.4 kedas.

"Ha'u haree ida ne'e la'ós fásil tanba OJE 2020 ne'e billaun $1.4 atu ezekuta fulan rua nia laran ne'e la'ós fásil," katak nia.

Nia mós kestiona kona-ba kapasidade ezekusaun husi kada ministériu, tanba bainhira iha relasaun ho dìvida, nia prosesu atu selu de'it dívida mós la'ós fulan ida-rua, maibé presiza tempu oitoan hodi halo reajusta domumentu sira, sá tan atu atende ba servisu sira ne'ebé foun.

"La'ós fásil, maibé osan sira ne'e karik ita lahatene iha balu bele fila-fali ba duadésimu, ninia kustu sira ne'ebé hasai ona, ne'e bele mais ita lahatene katak orsamentu normál ne'e tenke taka iha dezembru laran ne'e. Dalaruma sei bele halo estensaun ba inísiu 2021 karik, ida ne'e bele fásil, tanba sistema ne'e automátiku ne'ebé ezekusaun ne'e lais ka atraza kuandu sistema taka ona, nia tenke taka," dehan nia.

Nia hatutan, nível ezekusaun ki'ik, maibé osan boot, signifika governu laiha kapasidade atu halo ezekuasaun, entaun ida ne'e mak problema.

"Agora, ita iha ona Outubru la kleur tan Novembru, ba Dezembru ne'e, sistéma automátiku tenke para. Sira bele estende, ida ne'e desizaun konsellu ministru, maibé ida ne'e afeta teb-tebes nível ezekusaun ki'ik," nia hatete.

Maske nune'e, Sekjer FM ne'e husu governu atu uza OJE 2020 nian hodi selu de'it projeitu sira ne'ebé laiha kontratu sira, tanba servisu balun mak sira halo ona.(*)

PUBLISIDADE