Iha ninia vizita urijente ne’e, Ministru Jeronimo dehan, nia nota buat lubuk ida no fó ona orientasaun ba lideransa RTTL atu hadia.

“Orientasun ne'ebé mak fó ba RTTL, mak primeiru hadia uma-laran. Uma-laran ne'e tenke hadia, sai uma-laran ne'ebé mak kondusivu, sai uma-laran ne'ebe mak hotu-hotu hakarak mai atu servisu, di’ak karik di’ak ba nasaun no ba bens estar povu tomak ninian,” dehan Ministru ne’e.

Aleinde fó orientasaun, ministru ne’e mós dehan, hanesan ministru ne’ebé tutela ba RTTL, EP. no Ajensia Tatoli, iha dever no obrigasaun atu vizita hodi fó nafatin korajen ba sira atu serbisu di’ak liu tan.

“Nota buat lubuk ida, maibé ha’u orienta ona sira atu halo serbisu ida ne'e, i ha’u hein sira-nia rezultadu iha tempu badak, sira sei fó fali rezultadu ba ha’u," dehan Ministru ne’e.

Iha fatin hanesan, Prezidente RTTL, EP. Francisco da Silva "Gari" hatete, nia parte simu vizita husi   MAPKomS ne’ebé mai atu haree diretamente serbisu iha RTTL, nune'e mós orienta trabalador sira atu iha disiplina ba serbisu.

Tuir nia, hanesa estrutura foun ne'ebé foin simu posse no foin serbisu kompleta fulan 4, iha buat barak mak seidauk kompleta.