Tuir nia, durante ne’e deputadu hotu akompaña iha Komisaun Espesializada Permanente sira iha PN, maioria uza asesoria internasional.

Atu rezolve kestaun ne'e, nia fó hanoin, di’ak liu ba oin tenke tau orsamentu ba kada ba komisaun hodi tau asesor Timor-oan hodi akompaña asesor internasional sira hala’o serbisu.

"Agora ha’u husu, ita-boot sira tau orsamentu 2021 ne'e, kada komisun iha ema timor-oan sira atu sai asesor, atu reforsa ka lae? ka ita-boot sira tuur koa hotu tiha osan sira ne'e," dehan deputadu Bianco bainhira partisipa iha diskusun orsamentu privativu PN ba tinan 2021, Tersa (29/9).

Daudauk ne’e, nia hatete, komisaun D PN ne’ebé trata asuntu ekonomiku no dezenvolvimentu iha ona planu Timorizasaun ba asesor.

Tanba nia dehan, serbisu komisun D durante ne'e  atende instituisun estadu hamutuk 30, ida ne'e presiza tau rekursu umanu par bele atende.

Ba kestaun ne’e, Deputada bankada CNRT Carmelita Monis dehan, planu timorizasun ba asesor ne'e planu ne’ebé uluk eis prezidente Parlamentu Nasional, saudozu Fernando La Sama de Araujo inisia ona.

Nia dehan, iha momentu ne'eba, propoin Timor-oan 10 resin no konvida professor no dotor sira husi Indonezia hodi mai fó formasaun ba sira durante tinan ida no haruka mós sira ba tuir formasaun durante fulan 6 iha Brazil.

"Ema hirak ne'e agora daduk ita uza, na’in tolu sai xefe de divizaun, parese ke sira entre balun tur hela iha ita nia oin,  balun iha rekursu umanus i balun si teknika iha komisaun espesializadas permanenti sira, ita halo tiha ona politika ida ne'e laos seiduk halo," dehan nia.