Ministru Transportes no Komunikasaun, José Agostinho esplika, moras pandemia Covid-19 sei akontese nune'e guvernu seidauk iha hanoin atu loke hikas aeroportu liuliu relasiona ho komersial flight.
Tuir José saleinta, bainhira aviaun komersial hahu ne'e siginifika moras pandemia Covid-19 mos posibilidade tama hikas iha Timor-Leste, tanba ne'e bainhira iha situasaun nesesidade guvernu sei charter aviaun hodi hatan ba nesesidade inklui tula sidadaun TimorOan iha estranjeiru.
"Objetivu ida deit, oinsa prevene, purtantu bainhira hatur desizaun ruma presija tetu analiza vantajem no des-vantajem depois mak deside tanba ita hotu lakohi moras Covid-19 hadaet iha Timor-Leste," dehan José Agostinho iha Palásiu Governu Dili, Kuarta (23/9).
José hatutan, bainhira situasaun normal hikas, Ministeiru nia papel sei foti desizaun maibe dadaun ne'e situasaun emergensia mesmu iha ideias maibe nafatin hato'o, informa nune'e desizaun kolektiva.
Tanba ne'e, nia esplia, ideias atu loke hikas vou komersial signifika ema ka passajeiru iha liur sei nadodon tama no sei fo risku ba Timor-Leste.
"Se enkuantu Vou komersial, signifika ema nadodon tama mai, saida mak akontese, risku," dehan José.
Entertantu, Situasaun pandemia Covid-19 ne'ebé akontese halo nasaun hotu foti medidas prevensaun hanesan Timor-Leste ne'ebé liu husi Prezidenti Repúblika dekreta estadu emergensia hodi limita dereitu balun viagem internasional tantu sidadaun Timoroan inklui estranjeiru.