Governu Propoin Estende Tan EE

Palasiu do Governu Palasiu do Governu Foto File

Tempotimor (Dili)- Relasiona Surtu Covid-19 ne'ebé kontinua sai ameasa iha mundu inklui Timor-Leste, governu liuhusi Konsellu Ministru propoin ba Prezidente Repúblika, Francisco Guterres Lú Olo, atu estende tan Estadu Emerjénsia ba dala VI.

Tuir komunikadu imprensa ne'ebé www.tempotimor.com asesu, Kuarta (23/9), governu delibera atu propoin ba Prezidente Repúblika hodi estende tan Estadu Emerjénsia ba loron 30 mai. Tanba haree ba mudansa preokupante husi situasaun epidemiolójika no proliferasaun ba kazu rejistu husi kontájiu Covid-19 iha nivel rejionál no mundiál atu evita no neutraliza risku husi propagasaun SARS-CoV-2. Nune'e, proteje saúde publika no kapasidade resposta ba sistema nasionál saúde.

"Propoin ba Prezidente Repúblika katak liuhusi estensaun husi deklarasaun kona-ba Estadu Emerjénsia, premite suspende ka restrinje direitu tomak kona-ba sirkulasaun internasionál, sirkulasaun no fiksasaun rezidénsia no rezisténsia," hakerek iha ne’e.

Entretantu, governu propoin tan Estadu Emerjénsia ne'e rasik hamutuk ba VI bainhira Estadu Emerjénsia primeira faze to’o V faze relasiona ho Covid-19. Nune'e, EE ba dala V rasik sei remata iha fulan oin 4 Outubru 2020.

Tuir dadus husi Ministériu Saúde, Timor-Leste hahú la rejista ona kazu Covid-19 iha Tersa (22/9). Antes ne'e, kazu pozitivu Covid-19 hamutuk nain 27. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.