Prezidente Komisaun Funsaun Públika (KFP) Faustino Cardoso katak, funsionáriu barak servisu ho kondisaun dukur tanba idade avansadu.
"Ita labele obriga sira ne'ebé liu ona tinan 60, tanba lei la obriga, entaun depende ba ema idaidak nia hakarak, exeptu halo alterasaun ba lei númeru 12/2016, maibé kompeténsia eskluzivu Parlamentu Nasionál (PN) nian no depende ba idaidak nia rekerimentu, se bainhira rekerimentu tama, KFP prosesu depois enkamiña ba Institutu Nasionál Seguransa Sosiál (INSS) para prosesa ba situasaun seguransa sosiál ba ida-idak nian," dehan Prezidente KFP Faustino Cardoso iha Palásiu Governu, Tersa (8/9).
Faustino afirma, atu halo reforma ba funsionáriu sira, KFP ko'alia ona ho PN para heree, tanba funsionáriu barak mak halo servisu dukur no lakon ona produtividade.
"KFP komunika ona ho Parlamentu Nasionál (PN) para haree ida ne'e, para ita iha funsaun públika ida ne'ebé koresponde ho demográfika populasionál Timor-Leste nian ne'ebé maiória domina ho idade joven, duké ita iha funsaun públika ida kee katuas-ferik, horsida servisu mós matan dukur hela de'it no lakon ona produtividade," dehan Faustino.
Dadaun ne'e funsionáriu públiku, inklui ajente publiku iha TL hamutuk 33.031.
"Bazeia ba ami-nia relatóriu ne'ebé uluk ami aprezenta ba Parlamentu Nasionál (PN) iha fim 2019 katak funsionáriu públiku inklui ajente administrasaun públika hamutuk rihun 33.031. Husi númeru ne'e kuaze rihun 28 resin mak funsionáriu permanente no restu ne'e funsionáriu kontratadu no ajente administrasaun públika," nia tenik.
Husi total ne'e, la hola parte mós númeru kazual, tanba funsionáriu kazual dadaun ne'e liu ona rihun 6. Entaun bele dehan katak forsa trabalu ne'e kuaze liu ona rihun 40.(*)