"Ba ha'u-nia juventude sira katak, futuru Timor-Leste iha imi-nia liman, TL atu sai di'ak ka aat ne'e iha imi-nia liman," dehan Xefe Estadu Maiór Jerál F-FDTL, Majór Jenerál Lere Anan Timur, iha Kuartél Jerál Fatuhada, Sesta (4/9).
Nia afirma, maski futuru TL iha juventude nia liman maibé enkuantu katuas sira sei moris, hakarak halo buat di'ak hodi rai hela ba jerasaun foun sira.
"Enkuantu ami katuas sira sei moris, ne'e ami-nia responsabilidade, primeiru ami halo netik buat di’ak ruma hodi rai hela ba imi jerasaun foun sira iha futuru, ne'ebé futuru ne'e ita ko'alia katak hahú agora," nia dehan.
Komandante fitun rua ne'e apelu ba joven sira katak, polítika nunka moos tanba ne'e tenke hili polítika ida ne'ebé di'ak no moos.
"Ema polítiku mós nunka moos, kle'uk tun-kle'uk sa'e, sanak tun-sa'e, tanba ne'e imi hili sanak ida ne'ebé loloos para di'ak ba imi-nia futuru no nasaun nia futuru," Lere dehan.
Lere dehan, nasionalizmu no patriotizmu TL nian sosa ho ruin no ran ne'ebé FALINTIL no povu barak mate ba rai ida ne'e. (*)
