Portavós RNDJK, Ângela Freitas deklara, manifestasaun ne'ebé sei akontese iha dia 4 Setembru kansela tanba militár sira halo konfronta iha sede RNDJK hodi halo sosiedade tomak sai pániku.
Antes ne’e, Ângela Freitas dehan, RNDJK iha masa hamutuk 250.000 mak atu mai partisipa manifestasaun hodi hatún Lú Olo, maibé to’o horisehik observasaun www.tempotimor.com, la hatudu prezensa massa iha Dili.
Ângela hateten, relasiona ho situasaun ne'ebé militár sira hatudu nu’udar sinál ida hodi aplika sistema ditadura militár iha nasaun ne’e.
"Ami sei muda fila fali data (manifestasaun) tanba ho akontesimentu (serku militár) halo pániku ida ba ita-nia populasaun tomak”, tenik nia, iha sede RNDJK, Bairru Formoza, Kuarta (2/9).
Ângela hatutan, lei hakerek ona katak militár nia knaar mak atu asegura nasaun iha ameasa esterna, maibé haree momoos katak militár hasai fali knaar polisia nian atu halo atuasaun ba kualkér movimentu ne'ebé atu halo demonstrasaun.
"Ita presiza hamutuk atu haree ida ne'e atu labele prejudika fali ita-nia sidadaun sira atu la'o livremente espresa saida mak akontese iha ita-nia rain", dehan Ângela. (*)