Tempotimor (Dili)-Prezidente Parlamentu Nasional Aniceto Guteres hatete, too ohin loron deputadu sira iha PN sei simu nafatin subsidiu alozamentu $450 kada fulan. Bainhira soma hamutuk, iha tinan lima nia laran, estadu gasta osan hamutuk tokon $1,755,000 ba alozamentu deputadu 65.

Atu redus ka elimina total subsidiu alozamentu nee, Aniceto dehan, presiza duni atu harii uma ba deputadu sira neebé besik kedas edifisiu PN.

"To'o agora deputadu ida simu $450 ba alozamentu kada fulan, tinan ida, deputadu ida hetan S5.400, tinan ida 65 deputados hetan $351.000. Iha tinan lima estadu sei gasta $1.755.000 ba deit alozamentu,” dehan Aniceto.

Elimina subsidiu alozamentu nee, nia afirma, sai razaun ba PN atu harii uma ba deputadu.

PUBLISIDADE HUSI MOP FO PARABEMS BA LORON FALINTIL

Aleinde nee, razaun seluk ba PN harii uma ba deputadu iha komplesu edifisiu foun PN, tanba kestaun efikasia tempu serbisu.

"Kumprimentu rigorozu oras serbisu kondisional ho fatin no fasilidade serbisu neebé adekuadu sei produz rezultadu neebé ho kualidade diak liu tan iha futuru. neduni sede Parlamentu Nasional, rezidensia ba deputados, fasilidades no kondisoens adisionais seluk neebé relevante presiza hanoin no tetu agora par lori ita hotu kontribui ba forma ita-nia Parlamentu Nasional ho deputados neebé dezempeña serbisu ho kualidade diak iu tan iha futuru," Aniceto argumenta.

Hanesan titular ba orgaun ida ne'e, Prezidente PN nee dehan, sei hola vizaun boot kona-ba orgaun soberania nia sustentabilidade ho kualidade iha futuru neebé kondisiona mos ho infra-estrutura no fasilidades adekuadu.

Vizaun ida ne'e, nia dehan, laos atu hein tan maibé tenke hahú agora ho vizaun no konseitu estratejiku atu nune'e laos atinze kedas agora maibé neineik no beibeik sei atize meta ida nee.

"Vizaun no konseitu ne'e sei la finaliza iha tinan ida, rua ka tolu nia laran, singifika laos mai hau ka deputadu sira iha lejislaura ida ne'e, karik balun sei sai deputadu nafatin iha lejislatura sira tuir mai, ne'e kestaun seluk ida,” dehan nia.