Komunidade Balun iha Oekusi Seidauk Hetan Pagamentu Subsídiu Covid-19

Prezidente Autoridade Rejiaun Administrativu Espesial Oekusi-Ambenu (RAEOA), Arsénio Bano  ko'alia ba jornalista sira iha MSSI Kaikoli Sili (10/8) Prezidente Autoridade Rejiaun Administrativu Espesial Oekusi-Ambenu (RAEOA), Arsénio Bano ko'alia ba jornalista sira iha MSSI Kaikoli Sili (10/8) Fito Tempo Timor

TempoTimor (Dili) - Komunidade iha Aldeia Hautefu, Suku Banafi, Postu Administrativu Nitibe-Oekusi, to'o oras ne'e seidauk hetan pagamentu subsídiu Covid-19.


Prezidente Autoridade Rejiaun Administrativu Espesial Oekusi-Ambenu (RAEOA), Arsénio Bano hatete, to'o oras ne'e komunidade Aldeia Hautefu mak seidauk hetan subsídiu husi governu.

"Reklamasaun pendente ba aldeia ida Hautefu iha Oekusi mak seidauk hetan pagamentu, no agora tekniku sira halo hela servisu preparasaun para bele selu", dehan nia, ba jornalísta sira, iha edifisiu Ministériu Solidariedade Sosiál no Inkluzaun (MSSI), Kaikoli, Segunda (10/8).

Nia dehan, totál benefisiáriu ne'ebé antes ne'e sira planeia hodi submete ba MSSI iha Uma-kain rihun 20 liu, maibé depois iha prosesu verifikasaun ba too iha pagamentu iha de'it agregadu familiar hamutuk rihun 18 maka simu subsídiu.

"Uluk ne'e planu propósta tama ne'e rihun 20 família, maibé depois iha terrenu halo verifikasaun, tanba balu sala, balu dobru, balu tanba saláriu liu US$ 500 labele hetan subsídiu, entaun tun ba besik rihun 18", dehan Arsénio.

Nia dehan, ba kestaun ne'e MSSI halo hela esforsu hodi halo verifikasaun, no sira Oekusi hein de'it kuandu preparasaun hotu ona sira prontu atu koopera atu pagamentu ne'e bele hala'o ona. (*)  

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.