Vise-Ministru Negosiasaun Estranjeiru no Kooperasaun, Julião da Silva, hatete asuntu ne'e bainhira remata enkontru ho Primeiru Ministru, Taur Matan Ruak, iha Palásiu Governu, Segunda (10/08).
"Foin diskute ona, primeiru ita sei fó oportunidade exesaun hanesan diplomata sira bele mai hetan autorizasaun husi MNEK. Segundu, ba traballadór estranjeiru sira ne'ebé ema tékniku profisionál, hanesan mai konstrui ita-nia Portu Tibar, Aeroportu Nicolau Lobato, ne'ebé presiza obra boot, ne'e ita bele fasilita," dehan nia.
Nia hatutan, liuhusi reuniaun ho Primeiru Ministru, Taur Matan Ruak, hato'o ona sujestaun atu iha portaun entrada sira hanesan Mota-Ain, Oekusi no Suai, hetan autorizasaun husi konsuladu iha Kupang no Atambua para fó vistu ba sidadaun sira atu tama mai TL.
"Depende sé mak bele hetan Autorizasaun husi MNEK. Ne'e mak ita atu estabelese hela modelu hanesan vistu para bele hetan autorizasaun," tenik Julião.
Entretantu, sidadaun sira ne'ebé iha diáspora, governu liuhusi embaixada sira sei kontinua tau matan, bainhira karik iha tan subsídiu governu prontu apoiu.
MNEK rasik foti ona desizaun atu loke portaun entrada iha fronteira kada loron 17 hodi haree situasaun pandemia Covid-19 ba oin. (*)